Hasi dira Ander Deunaren jaiak
Haur jaioberriei herrira ongietorria egin zieten ostiralean, lehenengoz. Eleganteen eguna izan zen larunbatean. Haurren danborrada egin zuten igande goizean.
Txupinazo jendetsua, ostiralean. //Argazkia: Angel Elortza Asteburuan ospatu dituzte Ander Deuna jaien lehendabiziko egunak ormaiztegiarrek. Festak hasi baino ez dira egin, datozen egunetan jarraipena izango baitu egitarauak.
Txupinazo koloretsuarekin eman zieten hasiera ofizialki jaiei ostiralean, baina aurretik Ormaiztegi Show ikuskizuna izan zen Zubipen, San Andres herri eskolako Guraso Elkarteak antolatuta. Bestalde, herri kaleak musikaz jantzi zituen Triki txarangak, txupinazora arteko orduetan. Txupinazoaren aurretik, aurten lehenengoz, 2021 eta 2022 urteetan Ormaiztegin jaiotako 27 haurrei ongietorria egin zieten udaletxeko arkupetan. Jaietako zazpi pertsonalizatuak banatu zituzten hauen artean.
Jaietako ikur garrantzitsua den Eleganteen eguna izan zen arunbatean. Egun berean egin zen Zumalakarregi Museoak antolatutako XIX. mendeko Eleganteen Bilkura ere, aurten hamargarrenez.
Asteburu ‘elegantea’
Paseo elegantean 60 bat pertsonek hartu zuten parte. Zortzi soineko berri estreinatu zituzten eta Errenteriako Jantziaren zentroaren izenean, Iraultza dantza taldeko hamabi kidek ere parte hartu zuten. Ibilbidea luzatuta paseoa «arrakastatsuagoa» izan zen Cristina Alvarez museoko komunikazio arduradunaren hitzetan, «herritar gehiago bildu zen kalean paseoa ikustera. Leiho eta balkoietara ere jende asko atera zen», zehaztu du.
Eleganteen bazkaria aurten ere jendetsua izan da, Zubipen. Arratsaldeko txokolate dastaketa bezalatsu. Atzo, haurren danborrada izan zen goizean eta Goruntz dantza taldearen ikuskizuna Zubipen, arratsaldean.
Asteartean, mus txapelketa izango da 16:00etan gizarte etxean eta Rif 1923. Eustaquio Berriochoa Elgarrestaren argazkiak erakusketaren bisita gidatua Zumalakarregi museoan 18:30ean. Asteazken iluntzean, helduen danborrada egingo dute, 20:00etan. Gauean, 23:30ean hasita 70-90 hamarkadetako disko festa Oihan Vegarekin.
Ostegunean, Ander Deunaren egunez, meza nagusia izango da 11:30ean eta . 12:30ean, Xabin Ezkurdia, Rosario Berasategi, Kepa Jaka eta Aurelio Magallanesi eskertza ekitaldia egingo diete. Herri kirol jaialdiak eta toka, bote eta igel txapelketak borobilduko dute eguna. Asteburuan jarraituko dute festek. Jarraian duzuen estekan ikusgai duzue egitaraua osorik.
Ander Deunaren Jaiak 2023 Egitaraua _Ormaiztegiko Udala_web
Argazkiak: Angel Elortza
