Emakumeetan Zerain eta gizonetan Elur Txori izan dira bolari talde irabazleak
Zarautzi eroso irabazi zien Seguran jokatutako finala Zeraingo laukoteak. Gizonezkoetan, Goierriko bi ordezkariek ez zuten aurrean geratzerik lortu.
Segurako Txoritegi bolatokian larunbat goizean jokatu ziren Gipuzkoako Taldekako Bola Txapelketaren finalak. Bi txapeletako bat Goierrin mantentzea lortu zuten Zeraingo emakume bolarien taldekoek. Zarautzi 127-85 irabazi zioten.
Miren Makatzaga, Kontxita Gabiria, Aitziber Makatzaga eta Garbiñe Alustiza zeraindar bolariek jantzi dute, horrenbestez, Gipuzkoako txapela.
Gizonezkoetan, Elur Txori (Hernani) gailendu zen, 172 puntu batuta. Bigarren Ur-Mia (Ereñotzu, 165), hirugarren Segura (163) eta laugarren Gabiria-3 (157) sailkatu ziren.
Bolari Eguna Gabirian
Urteko denboraldi ofiziala amaitzeko, ohiturazko Gipuzkoako Bola eta Toka Eguna falta da. Ostiralean, abenduak 8, Gabirian ospatuko da aurten. Goizean, 09:30etik 11:00etara, bola eta toka tiraldiak izango dira.
Lagun arteko bazkaria Ostatuan egingo dute, 14:00etan. Aurrez izena eman behar zen. Iñaki Maiz bolari gabiriarra eta Ino Ugarteburu tokalari ezkiotarra omenduko dituzte festan.
Zeraingo bolari txapeldunak: Kontxita Gabiria, Miren Makatzaga, Garbiñe Alustiza eta Aitziber Makatzaga, larunbatean Seguran.
Hernaniko Elur Txori taldekoak, gizonezkoetan irabazle.
