Sentsazioen mundura bidaiatzeko ihes gela, Seguran
Aizkorpe bailarako 15 eta 18 urte bitarteko neskei zuzendutako ihes gela edo escape room jolasa antolatu du Segurako Udaleko parekidetasun arloak abenduaren 29rako. Aisialdirako ekintza parte hartzaileaz haratago, ihes gela bailarako neskak ahalduntzeko bitarteko izango da.
Gozamenez zentzumenen plazerean izena eman diote eta «sentsazioen mundura bidaia bat» proposatzen du. Parte hartzaileek bost zentzumenak erabiliz hainbat proba gainditu beharko dituzte «beren askatasuna berreskuratu eta kanpoko mundura ateratzeko».
Izena, hilaren 27ra arte
Aizkorpe bailarako sei edo zortzi bat neskez osatutako sei taldek parte hartu ahal izango dute ihes gelan. Idiazabal, Zegama, Zerain edo Mutiloako neskek ere izena emateko aukera izango dute, baina Segurakoek izango dute lehentasuna. Izena hemen klik eginda eman daiteke, abenduaren 27a baino lehen. Ihes gela kultur etxean jarriko dute, 10:00etatik 19:00etara.
