«Sagardo desberdinen esperientzia bat izatea bilatzen dugu»
Ordiziako Tximista sagardotegiko Aitor Esnaola. // ARGAZKIA: Ariane Vierbücher Denboraldi berriaren aurrean «ilusioz» dago Aitor Esnaola Ordiziako Tximista sagardotegiko arduraduna. «Egin ditugun sagardoek oso itxura ona daukate, eta urte guztian zehar egindako lanaren emaitza publikoak dastatzeko gogotsu gaude». Denboraldia ofizialki orain hasi bada ere, «abenduaren erdialdean uzta berria dastatzen hasteko moduan izan ginen», beraz, eguberritan Tximistara gerturatu zirenek sagardo berria edan zuten. «Jendeak asko eskertu du, gustukoa izan da eta asko pozten gaitu horrek!».
Ordiziako sagardotegian izango duten eskaintzaz nabarmendu du, «menu mailan, betikoa, kalitateari, genero onari eustea da erronka nagusia». Eta sagardoaz, «edukiko ditugu 12 bat kupela, eta gure koxka izaten da, desberdintasuna nabaritzea kupela batetik bestera, sagar nahasketa desberdinak izaten ditugu kupela bakoitzean, hala, jatera datozenek egiten duten zirkuitua sagardo desberdinen esperientzia bat izateko».
