Zunzunegi eta Ordoñez nagusi Garingo Mendi Lasterketan

Aitor Zunzunegi eta Maria Ordoñez izan dira irabazleak gaurko Garingo Mendi-Lasterketan. Goierri Trail Kopako lehenengo lasterketa izan da. Ikusle ugari eta festa-giroa nagusitu da Garin auzoan.

Maider Insausti

Beasain

2024/01/21

San Sebastian Jaiak iritsi dira aurtengoan ere Garin auzora, eta ohitura denez, mendi-lasterketa izan dute jaietako igande goiza girotuz. Aurtengoa edizio borobila izan dute, lasterketaren 10.urteurrena izan baita. Edizio honetan 256 parte-hartzaile izan dira, horietatik 46 emakumeak. Nabarmendu dute 10 urte hauetan emakumeen parte hartzea «gorantz» doala eta antolakuntzak honekiko «poztasuna» adierazi du. Goizeko 11:00etan ziren irtetekoak, baina 15minutuko atzerapenarekin hasi da lasterketa. Hiru itzuli eman dituzte korrikalariek. Lehen itzulia 2km-koa izan da, hurrena, berriz, 3km-koa, urtegiraino jaitsiz eta hirugarrenean, berriz, 1,5km-ko igoera lokaztua tarteko, 6km. Goierri Trail Kopako lehenengo lasterketa izan da gaurkoa eta Zunzunegi eta Ordoñez dira oraingoz Sprint distantziako lehen liderrak. Hurrengo lasterketa Ordiziako Mendi Lasterketa izango da.

Lasterketaz gain, ikuskizun ikusgarri bat ere izan dute Garinen. ‘Slakherria’ Elkarteko kideek, bertako bizilagunak izanik, 400m inguruko slackline-a jarri dute, aldenik alde eta bertan malabarak egin dituzte, baita beste mota batzuetako ariketak ere. Orekariak sokaren gainean alde batetik bestera ibili dira, begiradak ikusleen begirada guztiak haiengan iltzatuta zituztela. Horrez gain, Trapalata txaranga legazpiarra izan da goiza girotzen Garinen, lehenengo auzoan zehar aritu dira jotzen eta, ondoren, toki finko batean ikuskizunaren soinu banda izan dira, doinu ezagunekin.

Lehenengo gizonezkoak 52minutu eta 30segunduko denboran amaitu du ibilbidea eta bigarrenari eta hirugarrenari 25 eta 42 segundu atera dizkie, hurrenez hurren. Emakumezkoetan, adibidez, lehenengotik bigarrenera minutu bat baino gutxiagoko tartea izan da.

Sailkapena