Jose Angel Amutxastegik irudikatu du ondoen matematika
Hamargarren Matematika Argazki Lehiaketako herriko saritua Jesus Maria Rodriguez izan da. Parte hartzea handia izan da, 77 egileren 290 argazki jaso dituzte.
![](https://goierri.hitza.eus/site/files/2024/02/1-saria-triagulos-copia.jpg)
Nazioarteko Matematika Argazki lehiaketako irabazleei sariak banatu dizkiete. Lehenengo saria Jose Angel Amutxastegi Esnaolak jaso du Tringulos izenburua duen argazkiagatik. Bigarren saria Trianley Parisek irabazi du E MC3 argazkiagatik, eta hirugarren saria Arbil Iciar Manterolarentzat izan da En navidad argazkiagatik. Laugarren saritu ere izan zen, herriko sariduna hain zuzen ere. Jesus Maria Rodriguez Muñozek jaso zuen Ritmo izenburua jarri dion argazkiagatik.
Parte hartzeari dagokionez, handia izan da. 77 egileren 290 argazki jaso zituzten. Guztien artean, lehiaketaren helburuak eta oinarriak ondoen islatzen dituztenak aukeratu dituzte, Jose Hilario Garcia, Jualian Gil Garcia eta Angel Fernandez epaimahaikideek.
Lehiaketa hau, Lemniskata Goierriko zientzia sare herrikoiak eta Argizpi Beasaingo argazkilaritza elkarteak elkarlanean antolatzen dute, Urtarrila matematikaren bila zikloaren barruan. Helburuak dira, zientziaren dibulgazioa, matematika argazkietan irudikatuz, argazkilaritza sustatzea, eta eskualdeko elkarteen artean sareak jostea.
Beasaingo Igartza jauregiko erakusketa aretoan ikusgai daude lanak, ostiralera arte, 18:00etatik 20:00etara.
- 2. saria, Trinley Paris.
- 3. saria, Arbil Iciar Manterola.
- Herriko saria, Jesus Maria Rodriguez.
Emakumeak eta zientzia
Lemniskatak antolatutako hurrengo ekitaldiei dagokienez, otsailaren 14an Emakumeak Zientzian elkartearekin eta Ingeniarien Elkargoarekin bilera bat egingo dute, mahai-inguru bat egiteko. Hiru ingeniarik hartuko dute parte eta DBHko eta Batxilergoko ikasleei zuzenduta egongo da. Saioa Usurbe Antzokian egingo da.
Martxoan, berriz, Goierri Valleyrekin eta Goiekirekin batera, Made in Goierri zikloa egingo da, eta martxoaren 15ean, Teresa Cruz Andaluziako Juntako Descubre fundazioko zuzendaria izango da bertan, turismo zientifikoari buruz hitz egiteko. Azkenik, apirilaren 19an, Lazkaon, Bertsozientzia jarduera egingo dute. Gainera, beste jarduera batzuk iritsiko direla aurreratu dute.