Kirola elkarrekin ekimena izan dute Legazpin
Kirola Elkarrekin ekimena izan dute gaurkoan Legazpin Atzegiren eskutik eta jende ugari bildu da bertan elkarrekin kirol desberdinak egiteko.
Atzegik 12.urtez Kirola Elkarrekin ekimena antolatu du aurten ere eta gaur izan dute egun handia. Desgaitasuna fisikoa eta mentala duten kirolariak eta desgaitasunik gabekoak batu dira bertan, elkarrekin kirolaz gozatzeko. Goizeko 9:30etan eman diote hasiera egunari, Legazpiko udaletxean eta bertan, ongi etorria eman die udal ordezkariek parte-hartzaileei. Bertatik, kirol jarduerak egiteko lekuetara mugitu dira, hau da, Irene Paredes kirolgunera, Bikuña kiroldegira, Urbeltz pilotalekura edota Mauleon Hoteleko bolatokira. Kirol desberdinak egiteko aukera izan dute, gunearen arabera, hala nola, futbola, saskibaloia, pala, bola-jokoa eta abar.
Toki ugaritako jendea gerturatu da gaurkoan ere ekimen honetan parte hartzera eta 500 kirolaritik gora izan dira guztira.
