Goierritar ugari izango dira Ernairen topaketan
Ernai antolakundeak topaketak antolatu ditu bihartik igandera .Mahai inguruetan, solasaldietan, ekintza kulturaletan, lanean... goierritarrak izango dira
Iazko topaketan goierritarrek atera zuten argazkiaMaider Insausti Ernai gazte antolakundeak topaketak antolatu ditu bihartik igandera arte, Lezon (Gipuzkoa). Goierrik presentzia handia izango du: ez soilik bertatik joango diren gazteen kopuruagatik, ekintza ezberdinetan ere parte hartuko dutelako. Gogotsu eta gustura daudela adierazi dute Goierriko Ernaiko gazteek.
Beasaingo geltokian dute lehen hitzordua, bihar, 08:15ean. Autobusez elkarrekin joango dira Lezora. Txartelak erosteko azken eguna da gaurkoa. Arranon daude salgai.
Bihar bertan, Eraitz Saez de Egilazek, Aldaketaren errelatoa mahai inguruan parte hartuko du. Beñat Josue eta Asier Zamoranorekin elkarbanatuko du oholtza. Burujabetzaren eta eraldaketa sozialean sakontzearen inguruan hausnartuko dute, eta gazteek jokatu beharreko rolaz teorizatuko dute. 13:30ean izango da hitzaldia, ludotekan.
Saez de Egilaz, larunbatean, Pello Otxandiano EH Bilduren lehendakarigaiarekin batera izango da. Solasaldi honetan gazte militantzia, etxebizitzaren auzia, bizitzaren garestitzea, osasun mentala… landuko dituzte. 12:00etan izango da elkarrizketa, Akeitegian.
Mikel Urdangarinek hartuko die erreleboa. Guk utopikoak hitzaldia eskainiko du Lur Albizurekin batera. Telesfororen hitzei jarraiki, gizartea zerk limurtzen duen eta desirak nola eraikitzen diren aztertuko dute. Utopiek, desirek eta pasioek nazio askapenean zein paper jorratzen duten ere galdegingo dute. Larunbatean izango da, 13:30ean, ludotekan.
Klaruz tatuagile beasaindarrak, June Aiestaran bertsolari beasaindarrak eta Xarma Leone drag ordiziarrak ere parte hartuko dute asteburuan zehar izango diren hainbat ikuskizunetan.
Txosnetako tandetan ere lan egingo dute Goierriko ordezkariek. Gazteon eskutik ernalduko da udaberria jarri diote izenburua aurtengo topaketari.
Lezotik Iruñara
EH Bilduk Iruñan ospatuko du Aberri Eguna. Goierriko gazteak ere bertan izango dira, Lezotik zuzenean joango baitira bertara. 12:00etan egingo dute manifestazioa. Goierriko hainbat herritan ere egin dituzte deialdiak elkarrekin joateko Iruñara.
