Senior mailako pilota txapelketa hasiko da gaur Zegaman
Zegamak eta Berriobeitik elkarrekin antolatutako txapelketa da. Senior mailako pilotari onenek hartuko dute parte. Ligaxkako partidak Zegaman jokatuko dira hiru jardunalditan eta finala Berriobeitin.
Zegamako Toki Alai pilotalekua.Udala Zegamako eta Berriobeitiko (Nafarroa) herriek senior mailako pilota txapelketa antolatu dute elkarlanean. Ligaxka moduan egingo dituzte lehenengo kanporaketak, gaur arratsaldean hasita. Lau bikotek hartuko dute parte gaur eta maiatzaren 9an eta 16an jokatuko diren pilota partidetan. Ligaxkako partida guztiak Zegamako Toki Alai pilotalekuan jokatuko dira 19:00etan hasita. Finala ekainaren 9an izango da Berriobeitin.
Gaur egun, senior mailan dabiltzan pilotari onenetako batzuk hartuko dute parte txapelketan, tartean, munduko txapeldun batzuk ere badaudelarik.
Gaurko partidak, Toki Alain jokatuko dira 19:00etatik aurrera. Azketa eta Garcia, Labaka eta Bergeraren aurka arituko dira lehendabiziko partidan eta Canabal eta Garmendia, Carregal eta Elizegiren aurka, bigarrenean.
