Zegama-Aizkorri 2024
MENDI MARATOIA. Goierriko lau korrikalariren adierazpenak
Lide Urrestarazu eta Adur Mujika ordiziarrek lehen aldiz parte hartuko dute maratoian. Martin Diez segurarra bosgarrenaren bila doa, eta Jose Luis Perez 'Kalderete' zegamarrak zikloa itxi nahi du. Nahi eta helburu ezberdinak dituzte.
Lide Urrestarazu mendi korrikalari ordiziarra. Antton Guarest Korrikalari denek ez dituzte helburu berberak izaten lasterketa bat erronka modura jartzen dutenean. Ilusioa, gozatzea eta ahalik eta sentsazio onenekin bukatzea dira kirolari gehienek ahotan darabiltzatzen hitzak. Iazko giro makurraren ondotik, giro ona eskatzen dute aurtengo.
LIDE URRESTARAZU (ORDIZIA)
«Nire lehenengo maratoia izango da, eta ilusio bereziarekin nago»
Mendian egiten duen lehen maratoia izango da. «Orain arteko luzeena 30 kilometrotik gorakokoa izan da, baina lau ordutik gora inoiz. Hala ere, gogoa handiarekin nago, nahiz eta ez nagoen ohituta distantzia hauetan lehiatzen. Horrek errespetu pixka bat ematen dit». Denboraldi bikaina osatzen ari da ordiziarra, eta Skyrunner World Serietako lider modura iritsiko da Zegamako hitzordura, Euskal selekzioko ordezkari modura.
Aparteko prestaketarik ez da egiten ari, baina bai sekula baino kilometro gehiago. Korrikarako giro freskoa eta lokatza gustuko ditu, baina ikusleen azalean jarrita, giro ona eskatu du, bero handia egiten ez duen bitartean.
MARTIN DIEZ VIRTO (SEGURA)
«Ea aurten betiko ibilbidean zer denbora ateratzen den»
Aurtengo helburua iazko denbora hobetzea du, arantza moduko bat baitu iazkoarekin. «Aizkorritik Urbiara jaitsi ginen iaz zuzenean, gailurreria kendu zuten. Distantzia aldetik antzekoa izan zen, baina zalantza horrekin geratu nintzen. Ea aurten betiko ibilbidean zer egiten dugun, eta zer denbora ateratzen den», adierazi du.
Ez da lasterketa askotan lehiatu zalea segurarra: urtarrilean Garinen izan zen, otsailean Ordizian, martxoan selekzioarekin Espainiako txapelketan Murtzian, eta apirilean Gabiriako Leharrein. «Ez dut aitzakiarik behar entrenatzera ateratzeko, asko gustatzen zait. Nahiago dut entrenatu lasterketetan ibiltzea baino».
Iazko giro traketsarekin «ondo pasatu» zuela dio, baina aurtengo «giro ona nahiago» du. «Fresko baina lehor egin dezala, baita mendira joaten den jendearentzat ere. Eguna politago geratzen da eguraldi onarekin».
ADUR MUJIKA (ORDIZIA)
«Apuntatzeagatik apuntatu nintzen, eta aurrenekoan, barrura!»
Ez da mendi lasterketetan hasi zaharra. Orain bi urte Leitzako Euskal Herria Mendi Erronkan parte hartu zuen lagun batek animatuta. «Gustua hartu nien mendi lasterketei. Iaz beste batzuk egin nituen, eta horrelaxe nabil».
Otsailean Transgrancanaria egin zuen, eta uztailean G2H egingo du. Azken asteetan Aizkorri inguruan dabil entrenatzen: «Karrera bezala oso gogorra iruditzen zait, exijentea da. Urte asko dira ez naizela ikustera joan, baina giro hori ez dago inon, eta giro horrekin disfrutatu nahiko nuke. Hori da helburua. Ahal den onena egitera joango naiz, baina helburua gozatzea da, ateratzen dena ateratzen dela, erotu gabe».
JOSE LUIS PEREZ ‘KALDERETE’ (ZEGAMA)
«Beti hori esaten dugu, eta nire nahia hori da, aurtengoa azkena izatea»
Ziklo bat itxi nahi zuen Kalderetek alabarekin maratoia eginda. «Azkenekoa izatea zen asmoa. Aurrenekoa semearekin eta azkenekoa alabarekin. Beti hala esaten dugu, eta nire nahia hori da, azkena izatea. Aurten txukun bukatzearekin, konforme!». Sei ordu eta erdian du orain arte denborarik onena.
Mendizalea izan da betidanik, ehizan ere aritzen da, eta adinaren eskarmentua ere badu. «Bakarrik aterako naizenez entrenamendu gogorxeagoak egiten ari naiz orain. Hor nabil, serie batzuk egiten, eta gustura antzean. Pena izango litzateke aurten ez bukatzea».
