Irristaketa

Irristalarien ikuskizunak hartuko du Zaldibiako kalea gaur arratsaldean

Patin topaketa antolatu dute, hirugarren aldiz. Eguraldi iragarpenari so daude, kalean ala aterpean egin ikusteko. Irristaka eskolako haurren abilezia, martxa eta profesionalak ibiliko dira zirkuituetan.

Aimar Maiz

Zaldibia

2024/05/31

Beste urtebetez, irristaketa kirolaren ikuskizun bizia Zaldibiara ekarriko dute. Gaur arratsean izango da III. Patin Topaketa, herriko Irristaka patinaje taldeak eta udalak antolatuta. Santa Fe eta Artxanberri kaleetan atonduko dute zirkuitua, eta patinatzaileen abileziak eta ahalak bertatik bertara ikusi ahalko dira, eguraldiak baimentzen badu.

Izan ere, zoru lehorra eta ateri behar da patin topaketa kanpoan burutu dadin, eta eguraldi iragarpenak ez dira horren ziurrak. Antolatzaileek gaur bertan erabakiko dute, eguraldiaren arabera, non garatuko den: kalean, edo euria bada Resti pilotalekuan. Topaketaren izaeran eta parte-hartzaileen kopuruan ere eragina izango du, baldin eta estalpean egin beharra badago.

Haurrak eta adituak
«Eguraldiaren baitan gaude. Euria eginez gero, Resti frontoian egin beharko genuke, eta orduan, profesionalen lasterketa seguru aski ez genuke egingo», aurreratu du Irristaka taldeko Unai Matxainek. 15 bat patinatzaile aditu espero dituzte, ondo bidean.

Segurua dena, haurren partaidetza da. Ia 50 ume daude izena emanda: Irristakaren patinaje eskolan dabiltzan herritarrak, Tolosatik etorriko diren hogei-bat, eta inguruko herrietako zaletuak elkartuko dira. Abilezia zirkuitua prestatuko diete, eta martxa bat ere egitekoak dira.

Profesionalen kasuan, Santa Fe eta Artxanberri kaleetan ibiliko dira. 600 metro luzeko zirkuitua itxiko dute bueltan, eta hamar itzuli eman beharko dizkiote.

Adituen lasterketaren pizgarri, sariak ere jarri dituzte: oroigarri bana eta 150, 100 eta 75 euro aurreneko hiru sailkatuentzat.

Patin topaketa