Goierriko 11 bertsolari sailkatu dira udazkeneko Gipuzkoako Txapelketara
Amaitu da Gipuzkoa Bertsotan sailkatze lehiaketa; 34 txartelen herenak goierritarrek atera dituzte. Ataungo saioan Aner Peritz irabazle. Aratz Igartzabal eta Mikel Iturriotz ere, aurrerako. Hernaniko saioa Uxue Fernandezek irabazi du. Goierritar puntuatuena Araiztegi segurarra da.
Uxue Fernandez urretxuarra, Hernaniko saioan irabazle, atzo.Bertsozale Elkartea Apirilaren 25ean Gipuzkoa Bertsotan lehiaketa hasi zuten 74 bertsolarietatik 34k lortu dute udazkenean jokatuko den Gipuzkoako Txapelketara sartzea. Horien artean daude 11 goierritar, hasi ziren hamabostetatik gehienak. Proportzio orokorra ere esanguratsua da, sailkatu direnetatik hirutik bat Goierriko bertsolariak baitira.
Hiru eta lau parte-hartze dauzkan belaunaldi beteranoari, debutariena batu zaio, arrakasta handiz. June Aiestaran beasaindarra da labealdi berriaren ordezkari esanguratsu bat, B multzoan 10. lekuan pasatu baita aurrera. Lehiaketa banatu den bi multzoetatik bakoitzean, puntuazio handieneko 17nak jo dute aurrera.
Asteburuan, Ataun zen fokupeko lau saioetatik bat. Aner Peritz Euzkitze zarauztarrak irabazi zuen han (342 puntu), larunbat arratsaldean. Eneritz Artetxe azkoitiarra izan zen bigarren (333,5), eta kantuan ziren bi goierritarrak hurrena: Aratz Igartzabal hirugarren (319) eta Mikel Iturriotz laugarren (316,5). Irati Sanchez de Arevalok aurkeztu zuen, eta epaileen artean Maite Sukia herritarra aritu zen.
Asteburuko beste izen bat Uxue Fernandezena da. Hernanin onena izan zen, atzo. 2003tik parte hartu gabe egon ondoren, airoso egin du aurrera. Maddi Aiestaran hirugarren eta Maialen Akizu bosgarren geratu ziren han.
Eneko Araiztegik ere goitik gainditu ditu bi saioak. Soraluzen bigarren geratu zen, atzo. Bera da goierritarren artean puntu gehien batu duena (655,5).
Maddi Aiestaran kantuan, Hernaniko kanporaketan.Gipuzkoa Bertsotan
SAILKAPENAK
A multzoa
- 1. Aner Peritz, 674 puntu
- 2. Oihana Arana, 673
- 3. Jon Gurrutxaga, 673
- 4. Eneritz Artetxe, 660,5
- 5. Eneko Araiztegi (Segura), 655,5
- 6. Haizea Arana, 638
- 7. Manex Mujika, 637,5
- 8. Beñat Iguaran, 637,5
- 9. Iñigo Gorostartzu, 637
- 10. Eli Pagola, 636
- 11. Mikel Iturriotz (Urretxu), 632
- 12.Endika Igartzabal (Gabiria), 627
- 13. Aratz Igartzabal(Gabiria), 625,5
- 14. Oier Etxeberria, 624
- 15. Julen Zulaika, 618,5
- 16. Ane Beloki (Legazpi), 614,5 17.
- 17. Manex Astigarraga, 612,5
B Multzoa
- 1. Maider Arregi, 705,5
- 2. Ane Zuazubiskar, 701,5
- 3. Andoni Rekondo, 678
- 4. Aitor Tatiegi, 657
- 5. Maddi Aiestaran (Beasain), 647,5
- 6. Unai Izagirre, 645,5
- 7. Aitor Salegi, 643
- 8. Uxue Fernandez (Urretxu), 640,5
- 9. Maialen Akizu (Urretxu), 640,5
- 10. June Aiestaran (Beasain), 636
- 11. Aitor Zubikarai, 635,5
- 12. Manu Goiogana, 635
- 13. Gorka Maiz (Gabiria), 629
- 14. Andoni Mujika, 627,5
- 15. Oier Aizpurua, 614
- 16. Antton Aizpurua, 613,5
- 17. German Urteaga (Beasain), 613,5
*Sailkatu ez diren goierritarrak (B multzoa): 20. Odei Lopez (Legorreta), 605,5; eta 22. Antton Fernandez (Urretxu), 596,5
