Ordizian elkartu dira pentsiodunak
Goierri beheko jubilatuak eta pentsiodunak Ordiziako Plaza Nagusian elkartu dira gaur goizean.
Goierri beheko jubilatuak eta pentsiodunak Ordiziako Plaza Nagusian elkartu dira gaur goizean. “40 urtetik gorako kotizazioa duten erretiro aurreratuengatiko justifikatu gabeko zigorrak” izan dituzte hizpide amaierako hitzaldian: “Gobernuak aitortu duenez, Gizarteratze eta Gizarte Segurantza Ministerioaren datuak hartuta, Espainiako Estatuan 865.439 pertsona daude gaur egun (hamarnaka mila EAEn eta Nafarroan) aldez aurretik erretiratuta, eta 40 urte edo gehiago kotizatu arren, bizitza osorako murrizketa handiak jasaten dituzte pentsioetan. Erretiro aurreratu horietako gehienak berregituraketek, enpresen itxierek eta abarrek behartu dituzte. Horietako batzuek 20 urte baino gehiago daramatzate erretiratuta, eta beren lanpostuak utzi behar izan zituztenetik % 30eko edo gehiagoko zigorrak jasan dituzte beren pentsioetan, hil arte.
ASJUBI/40ko iturrien arabera, 2023 eta 2024 urteetan nahitaezko erretiro aurreratuak % 26ko murrizketa dakar 41 urte eta 6 hilabete egiaztatuta, ohiko adina baino lau urte lehenago erretiroa hartzera behartuta daudenentzat, hau da, 61 urterekin. Eta nahitaezko erretiro aurreratua 63 urterekin gertatzen bada, murrizketa % 13koa izango da.
ASJUBI/40ko ordezkariek salatu dutenez, Estatuko gobernuak beren eskaerei erantzungo dien itxaropena galdu dute, eta arazoa Europako erakundeetan planteatzea erabaki zuten. Izan ere, Europako Parlamentuak dagoeneko tramitera onartu du Espainiako Estatuaren aurkako kexa, karrera profesional luzeetako koefiziente murriztaileengatik. Gure ustez, 40 urtez lanean eta kotizatzen aritu den edozein langilek % 100arekin erretiratzeko eskubidea izan beharko luke. Horregatik, Euskal Herriko Pentsiodunen Mugimenduak bere egin eta defendatu ditu ASJUBI/40ren eskaerak”.
