Berritasun ugariko azoka
Hainbat aran mota ezberdin jarri dira salgai gaurko ferian: zuria, horia, berdea... Kalabazin zuria ere jarri du salgai Zeraingo Mendarte baserriko Iñaki Intxaustik. Ekoizle batzuk oporrak hartu dituzte eta hutsune batzuk izan dira, baina eroslerik ez da falta izan
Iñaki Intxausti, kalabazin zuriarekin Aranondoek eguzki argia behar dute fruitua emateko; azken egunetako eguraldiari esker, ernaldu dira zuhaitzak eta gaurko Ordiziako Azokako berritasunetako batzuk izan dira aranak. Oñatibi Txikiko Elosegik, esaterako, aran zuria eskaini du, kiloa 4 euroan. Jesus Oriak, berriz, aran berdeak edo Klaudia motakoak izan ditu, kiloa 5 euroan. Hirugarrenik, Uliako Labeakoen postuan, aran horiak izan dira, Corellakoak (Nafarroa); hauek kiloa 4 euroan saldu dira. Era berean, albertxikoak ere eskaini dituzte, prezio berean.
Barazkien artean, nabarmendu, Iñaki Intxaustik kalabazin zuria atera duela salmentara. Kiloa 3,5 euroan saldu du. Aire libreko leka ere izan da, Elosegiren eskutik, 5 euro kiloko. Udako bestelako barazkiak ere erruz eskaini dira.
Loreei dagokionez, alkatxofa sustraiak eta romanesku aza izan dira gaurko berritasunak. Ibarrako (Gipuzkoa) Iguategikoa baserriko Esther Illarramendik eraman ditu alkatxofa sustraiak. Romanesku aza lorea 20 zentimotan saldu da bakoitza.
Opor usaina
Nekazariek ere behar dituzte oporraldiak atseden hartzeko. Hala, Mikel Lasa ez da gaurkoa Ordzian izan. Hutsune “latza” izan dela aipatu dute bertaratutako batzuek. Barcinak asetu ditu mikologia zaleen nahiak: 40 bat kilo onddo eskaini ditu, kiloa 24 eta 33 euro artean; ziza horiak gutxiago izan ditu, 30 bat kilo (18 eta 20 euro artean kiloa). Erosleek ez dute oporrik hartu, dena den. jende ugari ibili da azoka, bereziki, Lizarrako (Nafarroa) jubilatu talde batek egin duen txangoari esker. Bi autobus bete dituzte Ordiziara etortzeko.
Hurrengo asteko azoka laburragoa izango da. 12:00etan txupinazoa botako dute Santa Ana festei hasiera emateko eta lehenago jasoko dituzte postuak tokia egiteko. Eta uztaileko azkeneko feria 30ean izango da, asteartean, San Inazio eguna asteazkenean egokitu baita aurten.
Corellako aranak eta albertxikoak
Jesus Oria, Klaudia aranekin
Oñatibi Txikiko Elosegi, aran zuriekin
Iñaki Intxausti, kalabazin zuriarekin
