Zaldibiako Txamarretxe auzoan larunbatean ospatuko dute festa
Toka jokoan Txamarretxen, orain bi urteko irudian.Iñaki Gurrutxaga Uztaileko hirugarren asteburuan ohi duten bezala, Zaldibiako Txamarretxe auzoko bizilagunek larunbat honetarako antolatu dute urteko festa. 18:30ean Iztueta dantza taldeak saioa egingo du, auzo hartan jaio ziren Juan Inazio Iztueta eta Jose Antonio Olano dantza-maisuen gomutan. Toka txapelketa 19:00etan hasiko da (izen-ematea 18:30etik).
Urteroko usadioari jarraituta, Arrese jatetxekoek ardoa eta Larrarte sagardotegiak sagardoa zerbitzatuko dute. Iluntzeko giroa Aitor Sarriegi eta Aitor Mendiluze bertsolariek piztuko dute.
Festako auzo afaria Arreserenean egingo dute, 21:00etan. Menuan entsalada, txuleta edo legatza arbaldatuta, postrea, edariak eta kafea sartzen dira (26 euro). Jatetxean bertan eman behar da izena.
Afal ondorena bertsolariek eta Agurtzane eta Jon Elustondo trikitilariek girotuko dute.
