Murumendira irteera, izarrak eta konstelazioak behatzeko
Abuztuaren 31tik irailaren 1era bitarteko gaua igaroko dute Murumendin, Arrano kultura elkarteak antolatuta. Izena eman daiteke dagoeneko.
Beasaingo Arrano Kultura Elkarteak irteera berezia antolatu du abuztuaren 31rako, larunbata. Murumendira joango dira, astronomiaz gozatzeko asmoz. Mandubiko Bentan elkartuko dira, 19:00etan, eta handik igoko dira Murumendira. Gero, izarrak eta konstelazioak ezagutuko dituzte, Aranzadiko adituen laguntzaz. Bertan igaroko dute gaua, eta hurrengo egunean Agortara jaitsiko dira, eta bertan hamaiketakoa eskainiko dute antolatzaileek. Gainera, auzoko jaiak izanik, goiza bertan pasatuko dute.
Partaide bakoitzak beharrezko materiala eraman beharko du, besteak beste, kataloxak, lo zakua, kanpin denda…, baita jatekoa eta edatekoa ere.
Izena emateko eta informazio gehiago eskatzeko, helbide elektroniko honetara idatzi behar da: arranoingurumena@hotmail.com.
