Artzain baten bizitza, gogoan
Baserritarren egunaren harira, Domingo Goiburu artzain idiazabaldarrari buruzko erakusketa antolatu dute Idiazabalen. Gaur zabalduko dute udaletxeko areto nagusian, 18:00etan.
Hilabete eskas pasatzen zuen Domingo Goiburuk Idiazabalen, haurra zela. Gainontzeko hilabeteak Urbian eta Bizkaian pasatzen zituen familiarekin eta etxeko artaldearekin. Artzaintza eta gaztagintza familiagandik jaso zituen eta 2012an hil zen arte, ardiak izan zituen, modu batean edo bestean, bizibide. Igandean, jaioterrian ospatuko duten artzain gazta txapelketa eta Baserritarren egunaren harira, bera protagonista duen erakusketa bat zabalduko dute gaur, 18:00etan, udaletxeko areto nagusian, Domingo Goiburu, artzain baten bizitza izenburupean. Datozen hiru asteburutan egongo da publikoari zabalduta, larunbatetan 11:00etatik 14:00etara eta 15:30etik 18:30era eta igandetan goizeko ordutegian, soilik.
1941ean jaio sen Goiburu Idiazabalen, eta 50eko hamarkadatik soldaduska egitera joan arteko urteak transhumantzia eta mendiko artzaintza uztartuz eman zituen. Transhumantziaren esperientzia «oso gogorra» izaten zela kontatzen zuen sarritan Goiburuk, Juanita Irastorza alargunak gogoratu duenez. «Bizkaia aldera joaten ziren, Morgara edo Fikara, azaro-abendutik apirila amaierara. Garai hartan Idiazabalen soro asko zegoen eta animalientzako bazka ugariagoa zen han», dio. Hiru eguneko bidaia izaten zen, «oso baldintza gogorretan». Handik itzulita, Urbiara joaten ziren beste bost hilabetez, maiatzetik urrira bitarte, «eguraldiaren arabera». Tarteko hilabetea egiten zuten Idiazabalen, etxean.
Bizimodu haren gogorraz jabetuta, soldadutza amaituta fabrikan hasi zen lanean, familiari lehentasuna emanda. Erretiroa hartu zuenean, «berriro itzuli zen bere gustuko lekura, baina bitarte horretan ez zituen sekula ardiak utzi». Goiburu gaztandegia sortu zuten bien artean; 2012tik Abel semeak du lekukoa.
Milaka urteko tradizioa
Gaur zabalduko duten erakusketarako Goiburuk gazta egiteko erabiltzen zituen lanabesak utzi dizkio udalari Irastorzak. Lanabesez gain, mendiko joan-etorrietan ganaduari jartzen zizkieten basteak edo albardak ere izango dira ikusgai. Saskietan eramaten zuten jatekoa, behor edo asto gainean. Basteak azpian jartzen ziren, animalia babesteko. «Domingoren aitak Bizkaian ikasi zuen basteak egiten, beste bati egiten ikusita. Ez zen kapritxo bat, behar bat zen animalientzako», dio Irastorzak.
Goiburu «gizon langilea, pertsona ona eta artzain hobea» zela dio Irastorzak. Erakusketa honek bat egiten du, hala, Baserritarren eguneko helburuekin: artzaintzaren eta gaztagintzaren atzean dagoen milaka urteko tradizioa balioan jartzea, alegia.