Hiru goierritar Euskaltel-Euskadiren 21 txirrindularien artean
Xabier Berasategi olaberritarrak, Xabier Isasa urretxuarrak eta Nicolas Alustiza zumarragarrak taldeak Elgoibarren egin duen egonaldi batean parte hartu dute.
Euskalte-Euskadiren 2025eko txirrindulari eta teknikari taldea, aste honetan, Elgoibarren. Euskaltel-Euskadi Euskaltel-Euskadi taldeak 2025ean izango duen 21 txirrindulari taldetik hiru izango dira goierritarrak: Xabier Berasategi olaberritarra, Xabier Isasa urretxuarra eta Nicolas Alustiza zumarragarra. Aste honetan egonaldi bat egin dute Elgoibarren 2025ko denboraldiko erronkei aurre egiteko Team building batean.
Denboraldiaurreko lau egunetan, taldea batzea, txirrindulari berriak elkartzea eta ongietorria ematea izan da lehentasuna, eta hurrengo urterako ildo nagusiak eta ibilbide-orria bultzatzea. “Eskakizuna ederra izango da, eta, horregatik, seriotasuna, parte-hartzea, erantzukizuna eta profesionaltasuna eskatu zaizkio kirol-egitura osoari”.
Taldearen kohesioa indartzeko aisialdiko hainbat jarduerez gain, multzo osoa Euskaltel babesle nagusiaren egoitzara gerturatu zen eta hitzaldi teknikoak jaso zituzten txirrindulariek hurrengo urterako material berria ezagutzeko. “Halaber, txirrindulari batzuek taldea hurbildu zuten Elgoibarko Ikastolara eta Herri Eskolara, bi ikastetxeetako haurrekin topaketan, kirol profesionalaren oinarriak eta bizitzako funtsezko balioak sustatzeko”.
Azanzaren eta Isasiren adierazpenak
Jorge Azanza Euskaltel-Euskadi taldeko kirol arduradunak “oso pozik” amaitu du astea: “Garrantzitsua zen elkar ezagutzea, hainbat berritasun ditugu-eta, eta familia egiten hastea. Gertukotasuna itzela izan da, txirrindulariekin, laguntzaileekin, patronatuarekin eta babesleekin. Jaso dugun talde-itxurarekin geratzen naiz. Oso ilusionatuta gaude eta datorren denboraldia hastea espero dugu gure aurpegirik onena eskaintzeko kirol arloan. Orain lan-jantzia jarri behar dugu eta serio lanean hasi, 2025a bertan dagoelako”.
Azanzak, Santi Barranco, Ruben Perez eta Pablo Urtasun kirol zuzendariek lagunduta, kirol-arloko helburu orokorrak ezarri dizkie txirrindulariei, eta lehiaketa-egutegia aurreratu du, baita egituraren oinarrizko arauak eta arduradunak ere. Fitxaketek banakako lehen hitzaldiak eta helburuen eta egutegiaren aurrerapena jaso dituzte, eta ostegunean lehen azterketa medikua eta fisikoa egin zuten.
Iñaki Isasik Euskadi Fundazioko presidenteak, bestetik, proiektuaren etapa berria hasi dela baieztatu zuen. Izan ere, Patronatu berriak hurbiltasuna erakutsi zuen taldearekiko, eta babesle nagusiak aurkeztu zituen arabarrak. Azkenik, Andoni Madariagak, lehendakariordeak, Euskadi Fundazioaren balioak eta ondarea ekarri zituen gogora; izan ere, proiektu soziala eta herrikoa da, bakarra eta desberdina, eta datozen hilabeteetan hori areagotu nahi du Euskadi Fundazioak.
21 txirrindulariko taldea
Euskaltel-Euskadi 2025eko 21 txirrindulari hauek osatuko dute: Jon Aberasturi, Jon Agirre, Nicolas Alustiza, Xabier Berasategi, Mikel Bizkarra, Iker Bonillo, David Dekker, Victor de la Parte, Marton Dina, Ander Ganzabal, Paul Hennequin, Xabier Isasa, Txomin Juaristi, Jordi Lopez, Andoni Lopez de Abetxuko, Gotzon Martin, Iker Mintegi, Jokin Murguialday, Louis Sutton, Danny van der Tuuk eta Unai Zubeldia.
