Olaberriko Elite Pala Txapelketak harrobiaren indarra erakutsiko du
Larunbatean hasiko da 10. ekitaldia, lau jardunaldikoa. Mundu mailako palako erreferentziak ekarriko dituzte.
Olaberriko 10. Elite Pala Txapelketa aurkezten, astelehen iluntzean. Aimar Maiz Olaberriko Elite Pala Txapelketak 10. ekitaldia izango du, aurten. Inoizko luzeena, ugariena eta kategoriaz zabalena antolatu dute. Larunbat honetan hasiko da, eta lau jardunaldi izango ditu, abenduaren 7an finalak jokatu arte.
Beste behin, mundu mailako palako izar handienak eta erreferentzia nagusiak gonbidatuko dituzte Olaberriara. Munduko 14 txapeldun eta lau profesional ohi ariko dira Olaberriko pilotalekuan. Tartean, Emiliano Skufca argentinarra –Olaberrian hiru txapel irabazia da–, Carlos Baeza espainiarra (4 txapel), Imanol Ibañez bilbotarra (2), edo Chatellier frantziar nahiz Agustin Maldonado argentinar txapeldunak.
Elite mailakoak bi modalitatetan lehiatuko dira: paleta larruz, final-laurdenak etzi hasita jardunaldi oro izango da partidaren bat; eta pala motzarekin (abenduaren 6an eta 7an). 23 urtez azpikoen mailan, bi goierritar nabarmendu daitezke: Xabier Naldaiz olaberritarra, bikotea Aketza Herrero gasteiztarrarekin ostatuta; eta Aimar Etxeberria zaldibiarra, Telmo Charro iruindarrarekin.
«Txapelketa berezia da, eta horrelako mailako pilotariekin jokatzeko aukera ez da egunero izaten. Ikasteko eta gozatzeko balioko digu», esan du Aimar Etxeberriak.
Haurrak ere bai
Lehenbiziko aldiz, elitekoekin batera Olaberriko pilota eskolako eta Oiangu elkarteko haurrek eta gaztetxoek jokatuko dute. Bost maila ditu txapelketak, benjamin-alebinena, infantil-kadeteena, 23 urtez azpikoena, eta eliteko bi modalitateena.
Goi mailako pilota eskaintzeaz gain, harrobiari ere bide-erakusle gerta dakion antolatu dute, 10. aldiz, Olaberriko pala txapelketa. «Hemengo pilotariei maila handiagokoekin jokatzeko aukera eman nahi diegu, beste herrialde batzuekin alderatuta zer urrun gauden jabetzeko, eta hobetzeko», azaldu du Xabier Berasategik. Eliteko ordezkaritza datorrela argitu du.
«Hazteko esperientzia» dela gehitu du Garikoitz Arrietak.
- Etzi. 16:00, benjamin-alebinen aurrekanporaketa eta finalaurrekoak; 18:30, nagusien paleta larruzko final-laurdena.
- Azaroak 30. 15:30, infantil-kadeteen eta 23 urtepekoen finalaurrekoak; 19:00, nagusien paleta larruz final-laurdena.
- Abenduak 6. Finalaurrekoak: nagusien paleta (16:30) eta pala motza (18:30).
- Abenduak 7. 15:30, finalak.
