Beñat Turrientesek jaso du Beasaingo Kirol Sari Nagusia
Turrientesentzat izan dira aurtengo ekitaldiko sei sarietako hiru: gizonezko kirolari onenaren saria, ohorezko Beasain saria, eta kirol sari nagusia. Beste hainbat beasaindar pasa dira gaurkoan oholtzatik aipamenak jasotzera.
Jende andana bildu da Beasaingo Igartza Jauregian egindako urteroko kirolari, elkarte eta erakundeen urte amaierako aitortza handiaren jaiean. Modu batera edo bestera, aurten herrian kirol alorreko jarduera bultzatzen, sustatzen edota emaitzetan nabarmendu diren pertsonen, elkarteen eta erakundeen aipamen berezia egitea eta jende aurreko aitortza eta esker ona adieraztea da helburua.
Herritarrak izan dira, aurtengoan ere, sarituak izateko hautagaiak proposatzeko aukera izan dutenak. Ondoren, epaimahaiak proposamen guztiak aztertu, izangaien merezimenduak baloratu eta urteko sariak eta aipamen bereziak erabaki eta jakinarazi ditu.
Denera, sei errekonozimendu egin dituzte gaur arratsaldeko ekitaldian, eta denetariko kirolariak nagusitu dira: futbolariak, txirrindulariak, pilotariak, saskibaloi jokalariak, mendi lasterkariak eta abar. Horiez gain, aipamen bereziak egin dira, eta urte luzeetan zehar mendi lasterketen zein maratoien antolakuntzan ibili diren elkarte zein bolondresak ere izan dira bertan. Esker hitzak izan dituzte saritu guztiek, eta haien senide zein lagunak gogoratu dituzte horietako askok.
Beñat Turrientes Imazentzat izan da gaurkoan Beasaingo Kirol Sari Nagusia. Lau urtez behin jokatzen diren olinpiar jokoetan parte hartu eta urrezko domina etxeratu izanagatik; beasaindarrak zelaian erakusten dituen “indarra, dotorezia, adimen taktikoa, erabaki azkarrak eta taldea gidatzeko giltza” nabarmendu dituzte. Gizonezko kirolari onenaren saria eta Ohorezko Beasain saria ere irabazi ditu gaurkoan.
Turrientesez gain, baina, 2024ko Beasain Kirol Sarietan ondorengoak izan dira sarituak:
Emakumezko kirolaria saria: Naxara Odriozola Lekuona (txirrindularia)
Urteko kirol jardunaldia: Emakumeen Euskal Kopa (saskibaloia)
Erakunde babeslea: Iturrioz eraikuntzak
