Joxemiel Barandiaranen etxea ezagutzeko aukera izan da gaur goizean
Bisitariek, Barandiaranen ekarpenen inguruko informazioa jaso eta azken urteak eman zituen Sara etxea bisitatzeko aukera izan dute.
Joxemiel Barandiaranen gela, Sara etxean. Euskal kultura, etnologia eta antropologian erreferente izan zen Joxemiel Barandiaranen (1889-1991) etxearen zati bat ezagutzeko aukera izan da gaur goizean. Ekimenaren helburua Barandiaranek Ataunen egindako lan oparoa ezagutaraztea eta bere bizitzaren testuingurua gertutik erakustea izan da. Bisita 11:00etan hasi da Barandiaran museoan, eta bi orduko iraupena izan du.
Gidari espezializatu baten laguntzarekin, lehenik, antropologoaren bizitzaren inguruko informazioa jaso dute bisitariek. Barandiaranek garai hartan baliatzen zituen lan tresnen, ohituren eta bizilekuaren inguruko xehetasunak ezagutzeko aukera izan dute. Ondoren, Joxemielek azken arnasa bota zuen Sara etxera joan dira bisitariak oinez. Barrura sartzerik izan ez badute ere, leihoak irekita, Joxemielen lantokia izan zen bere gela ikusteko aukera izan dute. Joxemiel etxe hartan jaio ez bazen ere, bertan hil zen, 102 urte betetzeko hamar egun falta zitzaizkiola.
