Indarra eta elkartasuna Sahararen alde

Sahararen aldeko 16. krosa egin dute goizean Ormaiztegin. Ibilbide motzean Adrian Pajares eta Nagore Lizardi gailendu dira, eta luzean, Xabi Santxez eta Enara Agote.

Lide Egizala Urteaga

Ormaiztegi

2025/02/23

Giro paregabea izan dute korrikalari zein herritarrek Sahararen aldeko krossean. 10:00etatik aurrera haurren probak egin dituzte, eta 11:00etan helduen txanda izan da. Udaletxe aurretik hasita herri barruan zeharreko ibilbidea osatu dute haurrek, adinka banatuta. Ondoren, kategoria bakoitzeko sari banaketa egin ostean, 11:00etan helduak abiatu dira bi distantzietan: 5km eta 10km-tan. Lasterketa ohiko formatuan egin duten arren, ibilbidean aldaketa txiki bat egon da eta aldapa “gogor” bati aurre egin behar izan die lasterkariek.

Lasterketa laburrean, Adrian Pajares izan da helmugaratzen lehena, eta emakumezkoetan, Nagore Lizardi. Lasterketa luzean, batera helmugaratu dira Xabi Santxez eta Joseba Eskudero idiazabaldarrak. Emakumezkoetan, berriz, Enara Agote izan da irabazlea. Lasterketarekin amaiera eman diote Sahararen aldeko asteburuari.