Argi Berrin zorionak opatzeko arrazoi bikoitza Libe Goenagak

Bertsolari gazteentzako 27. Argi Berri bertso saria irabazi du getariarrak, 26 urte bete dituen egunean. Haira Aizpurua sailkatu da Osinalde Sariko finalera, berekin batera.

Aimar Maiz

Ordizia

2025/03/29

Bertsolari gazteentzako Goierriko sariketen bidaia gaur hasi da, Ordizian, 27. Argi Berri Saria jokatuta. Betiko formatuarekin baina ordutegia aldatuta, lehen aldiz bazkal ondoan jokatu da bertso lehiaketa. Libe Goenaga getariarrak irabazi du entzuleek beren gustukoenaren alde ematen duten bozketan Argi Berri saria, eta Txikia garaikurra jaso du. Epaileen puntuazioz, Haira Aizpurua saratarra eta Goenaga bera sailkatu dira Osinaldera. Lazkao Txikiren bizitza eta bizipenak jasotzen dituen Irriz eta Malkoz liburuki parea ere jaso dute opari denek.

Goenagak 26 urte bete ditu gaur, eta Zorionak zuri abestu diote elkarteko guztiek, lan puntuagarriak amaitutakoan. “Gaur edozer dala’re, bota zorionak” bukatu du azken agurreko bertsoa, artean puntuak eta sailkapenak jakin gabe zeudenean. Bi arrazoi bazituen, behin epaia emandakoan.

Igor Eguren aurkezlearen esanetara, sei bertsolarik gozatu dituzte entzuleen belarriak. Mahaiko esertzeko ordenean, Goenaga, Danel Herrarte aramaioarra, Irantzu Idoate hazparnearra, Aizpurua, Mikel Etxezarreta olaberritarra –saioko goierritar bakarra, eta aurtengo 18 bertsolarien arteko bietatik bat– eta Maite Sarasola deustuarra jardun dira. Nola ofiziotan, hala bakarkako lanetan, oso maila ona eman dute. Asebeteta eta gustura geratu dira Argi Berriko bertsozaleak. Bazkaltzen 47 lagun siren, eta ondoren beste hamar-dozena bat gehiago sartu dira saio entzutera.

Mikrorik gabe baina ahots zein aldarte tonu ezin hobean jardun dira seiak. Epaile lanak Martin Aramendik, Maite Sukiak eta Mikel Irastortzak egin dituzte, eta koplatako ariketan zein tarteak alaitzen Ekhi eta Iker Irribarria trikitalari aramarrak aritu dira; aurkezlearen izengoitiz, Trikibarriatarrak.

Aldaketarekin entzule gehiago erakartzea zuten helburu Argi Berriko antolatzaileek. Hein batean, lortu dute. Gaueko jardunetik beherakadarik ez da sumatu, behintzat. “Kopuruz antzeko ibili gara gaur ere, baina orokorrean jendeak eskertu digu aldaketa, kanpotik etorritakoek eta”, azaldu du sariketaren koordinatzaile lanetan debutatu duen Aitor Aguado gazteak. Bertsolarien mailarekin oso konforme geratu da. Arduradun bezala ere, aurreneko plazaratzean gustura sentitu dela aitortu du, taldearekin babesagatik beti ere: “Taldea gara, azken batean. Nik prestaketa eta tramite lana egin dut gehien bat, baina sukaldean ere gehiago aritu dira, eta Joxemari Barandiaranek ere asko lagundu dit. Lanak banatu ditugu”.

Bertsolari gazteen hurrengo saioa Zaldibian izango da, apirilaren 4an. Osinberde sarian kantatu dute datorren larunbat gauean Ekain Alegrek, Iruri Altzerrekak, Janire Arrizabalagak, Josu Ibargurenek, Eki Mateorenak eta Jon Mendiluzek. Joxi Irastortza izango da aurkezle eta gai jartzaile. Hirugarren eta azken kanporaketa, Aztirikoa, apirilaren 12an jokatuko da, afal ondoren hori ere. Maddi Agirre, June Aiestaran beasaindarra –aurtengo beste goierritarra–, Naia Arrizabalaga, Beñat Astiz, Peru Irastortza eta Aitor Tatiegi gonbidatu dituzte Aztiri Bat elkartera, Eresti Oiarbidek aurkeztuta.