1936-1945 artean gertatutakoak gogora ekarri dituzte Olaberrin
'Eraman zutela' dokumentala eta 'Olaberria 1936-1945' liburua aurkeztu dituzte kultur areto berrian. Hirurehun pertsonatik gora elkartu dira ekitaldian.
Mikel Balerdi Arruabarrena eta Deñe Garcia-Bravo Alberdi, 'Eraman zutela' dokumentalaren egileak. Maria Laespada Lazpita Aranzadi Zientzia elkarteko historialariak ondutako Olaberria 1936-1945 liburua eta Mikel Balerdi Arruabarrenak eta Deñe Garcia-Bravo Alberdik egindako Eraman zutela dokumentala estreinatu dituzte Olaberriko kultur areto berrian. Bi proiektuen egileek hitza hartu aurretik, txalaparta eta biolontxelo errezitaldia izan dira, eta ondoren, Olaberriko alkatea esker onez mintzatu da herritarrei, euren inplikazioa eskertuz. Jarraian, Lazpitak bere liburua egiteko prozesuaz hitz egin du, baita liburuan aurkitu daitekeena azaldu ere. Ondoren, Balerdik eta Garcia-Bravok Eraman zutela aurkeztu, eta segidan, dokumentala proiektuatu dute. Aretoa txiki gelditu da ekitaldira bertaratu diren hirurehundik gorako pertsonentzat.
Olaberria 1936-1945 liburua
Liburuan 36ko gerran eta frankismoaren hasieran olaberritarrei gertaturikoak kontatzen ditu Laespadak. Aurreneko kapitulua, baina, bigarren errepublikaren ingurukoa da, «gerraren aurrekariak ezagutzeko eta irakurlea kontakizunean kokatzeko». Ondorengo kapituluetan estatu kolpea eman zenetik tropa frankistak Olaberrira sartu ziren artekoak narratzen ditu: giza eskubideen urraketak, erbesteratutako herritarrak, gerrara joandakoak, hildakoak… eta ostean, «tarte luzea» eskaintzen dio urte haietan emandako errepresioari, hala nola errepresio ekonomikoari, emakumeen aurkakoari, epaiz kanpo fusilatutakoei egindakoari… Testigantzei ere tartea egin diela azalerazi du: «Biografia motzen bitartez ahalegindu naiz herritarrei eta herriari gertatutakoa azaltzen».
Eraman zutela dokumentala
Martzelo Lasa eta Jesus Bujanda olaberritarren istorioa kontatzen da dokumentalean. Horretarako, garai haietan bizi izan ziren olaberritarren testigantzak baliatu dituzte Balerdik eta Garcia-Bravok. Zortzi hilabetetan ondutako lan honetan gai desberdinak jorratu dituzte, esaterako emakumearen rola eta elizak garai haietan herritarrekin izandako jarrera, besteak beste. Bi sortzaileen esanetan, Olargi taldeko kideek ahalbidetutako elkarrizketak ikusitakoan erabaki zuten testigantzen bitartez istorioa kontatzea. 40 minutuko ikus-entzunezkoa da.
Gaurko ekitaldia,Olargi Memoria Historikoko taldeak, Olaberriko Udalak, Aranzadi Zientzia Elkarteak eta Aztarna Productions-ek elkarlanean egindako lanaren emaitza izan da.
