Fernandezen ‘Loreontziak: lorerik gabeko ontziak’ erakusketa Igartubeitin
Erakusketa apirilaren 4tik 6ra egongo da ikusgai. Ezkio-Itsasoko eskolako haurrek artelanak sortuko dituzte ostegunean, erakusketarako.
Zuhaitza loretan, Igartubeitin. Tere Madinabeitia Oier Fernandez Carrasco artista zumarragarraren Lorontziak: lorerik gabeko ontziak erakusketa parte hartzailea irekiko dute Igartubeiti baserrian apirilaren 4tik 6ra bitartean. Aurretik, apirilaren 3an, Ezkio-Itsasoko eskolako haurrekin «ekintza berezi bat» egingo dutela aurreratu dute antolatzaileek.
Asteburuan irekiko den erakusketan Fernandezek loreekin duen harremana jarriko dute ikusgai: «Aspaldi galdetu nion nire buruari zergatik margotzen nituen loreak; zein den loreekin dudan harremana», dio. Sortzaileak loreekin duen harremana zalantzan jarri du eta erakusketa bihurtu.
Haurren ekarpena
Erakusketa apirilaren 4an, 19:00etan irekiko da. Gonbidapena irekia da eta bertaratuko direnei loreak eramatea eskatu die artistak. Irekiera ekitaldian parte hartzen dutenek espazio berriak sortuko dituzte eta hori ere erakusketaren parte izango da, «baserrian zerbait egiteko gogoa nuen eta loreena aspalditik nerabilen buruan. Bi ideien arteko lotura da lan hau».
Erakusketa ofizialki ireki aurretik, Ezkio-Itsasoko eskolako haurrek beren ekarpena egiteko aukera izango dute ostegunean. Igartubeitiko baratza landuko dute eta ondoren, erakusketa ikusteko aukera izango dute. Artelanak sortuko dituzte loreak eta loreontziak oinarri hartuta eta artelan hauek erakusketaren parte bihurtuko dira.
