TAO ordenantza berria gaur sartu da indarrean Beasainen
Barrendaindik Dolarearainoko eremua hartuko du TAO gune berriak. Aparkatzeko ordainpeko eremuak desberdindu dituzte. Egoiliar txartelak arreta bulegoan kudeatu daitezke aurrez txanda eskatuta.
TAO makina berria Oriamendi kalean.Ariane Vierbücher Gaur, apirilak 1, Beasainek TAO gune berria estreinatu du, trafikoari buruzko ordenantza berria gaur sartu baita indarrean. Ordenantza berrituaren arabera, tren-geltokitik hasita Dolarearaino ordainpeko aparkaleku arautuak izango dira, egoiliarrentzako plaza esklusibo gehiago sortuko dira eta TAO gune guztietan (berdea, urdina eta marroia) doako aparkalekua 15 minututik 20 minutura luzatuko da.
Bernedoeneako aparkalekua (osasun zentroaren ondoan dagoena), Igartza futbol zelaiaren ondoan dagoen aparkalekua, Antzizar kiroldegiaren ondoko auzo osoa eta Foru Kalea ere aparkaleku librekoak izango dira aurrerantzean ere, hau da, ezarritako sektoreen mugakide diren zenbait kale, erregulaziotik kanpo geratuko dira.
Egoiliar txartelak
Kolore desberdinak erabiliz egoiliarren guneak, errotazio altukoak, ertainekoak eta motzekoak bereizi dira. Bizilagunek, enpresa bat dutenek eta landa eremuetako bizilagunek, egoiliar txartela eskatzeko eskubidea dute, udaletxeko TAO arreta bulegoan eta telematikoki. Urteko 50 euroko kostua izango du txartela ateratzeak.
Gainontzean, aparkatzeko denbora mugatuko ordainpeko eremuak zabaldu egin dira. Aparkatzeko epealdiaren araberako eremuak banatu dituzte, kolore desberdinekin markatu dituztenak. Gune marroia egonaldi motzetarako izango da; gune urdina egonaldi ertainetarako; eta gune berdea egonaldi luzeetarako.
Arau hausteak
Arau-hauste arinak dira tiketeko denbora gainditzea edo tiketik gabe aparkatzea, eta autoa egoiliarren gune batean uztea edo TAO guneetan motor bat aparkatzea. 40 eurokoa izango da isuna. 48 orduko epean ordaintzen bada, beherapena izango da. Gainera, ordaindutako denboraren bikoitza gainditzen bada, garabiak autoa eraman dezake. Arau-hauste larriak dira baimenik gabeko ibilgailu batean egoiliar-txartela edo merkatari-baimena erabiltzea, bizileku-aldaketak edo ibilgailuaren transferentzia ez jakinaraztea eta manipulatutako tiketa erabiltzea; 200 euroko isuna izango du.
Gune marroia (egonaldi motza): Lehen 20 minutuak doan. Gehienez ordu eta erdi aparkatu ahalko da (1,5€). Egoiliar-baimenarekin ezin da aparkatu. Gernika pasealekuko frontoi atzea, Barrendain plaza eta Anbulategia.
Gune urdina (egonaldi ertaina): Lehen 20 minutuak doan. Gehienez 4 ordu (4€). Goiz edo arratsaldeko ordutegi blokeak osatzeko aukera. Egoiliar-baimenarekin aparkatu ahalko da, sektore berekoa bada. Erdigunean, S1 eta S2 sektoreetan kokatzen da.
Gune berdea (egonaldi luzea): Lehen 20 minutuak doan. Gehienez 7,5 ordu (3€). Egoiliar-baimenarekin ezin da aparkatu, landa-auzoetako herritarrek izan ezik. Gipuzkoa plaza, Trenbide kalea eta Gernikako pasealekua.
Gune gorria (Ezkiaga): Ezkiaga sektorean (ZE). Orain arte bezala. Egoiliarren ordutegia: astelehenetik ostiralera 23:00etatik 08:30era.
B-R egoiliar-baimendun plaza esklusiboak (berria): Baimendutako egoiliarrak bakarrik (S1 edo S2). Urte osoan, 24 orduz. S1 sektorean baimendutako egoiliarrek ezin izango dute S2ko egoiliarren plazetan aparkatu, eta alderantziz.
