Zeraingo Udalak 736.000 euroko aurrekontua onartu du 2025erako
Gurea pilotalekuko teilatuan eguzki plakak jarriko dituzte. Lanak esleipen prozesuan daude.
Zeraingo Udalak 736.000 euroko udal aurrekontua onartu du 2025 urterako. Aurrekontua martxoaren 17ko osoko bilkuran onartu zuen udalbatzak EH Bilduren aldeko botoekin. Zerain Burujabek kontra bozkatu zuen. Beste urte batzuetakoa baino aurrekontu handiago izango du Zerainek, batez ere, Foru Funtsetik ohi baino «170.000 euro gehiago» jasoko dituelako batez beste, Arantzazu Gereñu alkateak zehaztu duenez. Ongi etorria izan da, noski, igoera, «herri txiki hauetan ez daukagu besterik, bultzada bat emango dio herriari», azpimarratu du alkateak.
Ez da Zerainen proiektu asko aurrera eramango den urtea izango, baina bai datozen urteetarako inbertsio posibleak aztertu eta lantzekoa. Izan ere, Zerainen diru publikoaren laguntza «ezinbestekoa» da proiektuak gauzatzeko.
Eguzki plakak frontoian
Udaleko gastuei dagokienean, 210.000 euro aurreikusi dituzte pertsonal gastuetara. «Aintzat hartuta dago aurrekontuan udaleko idazkaria hemendik aurrera %50eko lanaldian arituko dela eta ez %30ean orain arte bezala», azaldu du alkateak. Orain gutxira arte idazkaria partekatzen zuten Zerain, Mutiloa eta Zalduondoko (Araba) udalek. Orain urte bete Zalduondo ekuaziotik atera zen, eta hemendik aurrera Mutiloan eta Zerainen arituko da idazkaria. Hautaketa prozesuan daude oraintxe. Bestelakoei begiratuta, gastu arruntetara 140.000 euro bideratuko ditu udalak; urtean zehar egiten diren kultur jardueretara 3.000 euro eta Andra Mari jaietarako beste 10.000 euro.
Inbertsioei dagokienean, Gurea pilotalekuko teilatuan eguzki plakak jartzeko proiektua dute aurreikusita (68.000 euro). Iaz egitekoak ziren lanak, baina azkenean aurten gauzatuko dituzte. «Proiektua esleipen prozesuan dago, aurkeztutako enpresen proiektuak aztertzen ari gara», dio Gereñuk. 54.000 euroko diru laguntza dute lan hauek.
Datozen urteetarako «mediku etxea berritzea» ere aurreikusita daukate. Aurten landuko dute diru laguntza eskaera. Biodibertsitate gaiei dagokionean ere, «herri lurretan landare inbaditzaileak kendu eta bertako espeziak sartzeko» proiektua ere aztertzen ari dira.
