Jose Mujica herriko seme kutun izendatzeko proposamena aurkeztuko du Podemosek
Ekimenak Mujicaren ibilbide politiko eta bere humanismoari balioa emateko nahia du abiapuntu.
Jose Mujica Astigarretako Muxika baserrira egin zuen bisitan, 2015 urtean.Loinaz Agirre Elkarrekin Podemos udal taldeak Jose Alberto Mujica Cordano Uruguaiko presidente ohia Beasaingo herriko seme kutun izendatzeko proposamena aurkeztuko du Beasaingo udalaren hurrengo osoko bilkuran. Ekimenak Mujicaren ibilbide politiko eta bere humanismoari balioa emateko nahia du abiapuntu, nazioartean oso aitortua baita.
1935ean Montevideon jaioa, Jose Mujicak behin baino gehiagotan adierazi du bere euskal jatorria ezagutzeko interesa. Interes horren ondorioz, Astigarreta auzoa bisitatu zuen, bere arbasoen baserri zaharra dagoen auzoa.
Sustraien alderdi emozionaletik haratago, Podemosen proposamenak Mujicaren figura nabarmendu nahi du, “zintzotasunaren, umiltasunaren eta gizarte-konpromisoaren munduko sinbolo gisa”, izan ere, “Uruguaiko presidente izan zen garaian (2010-2015), bizimodu apala izan zuen, herritarrekiko etengabeko hurbiltasuna eta guztien onerako politikak ezarri zituen. Giza eskubideen defentsa irmoak, ekitateak eta demokrazia parte-hartzaileak munduko milioika pertsonen errespetua eta miresmena ekarri diote”.
Elkarrekin Podemosen ustez, “mundu mailan diskurtso autoritarioen gorakadak eta politikaren deshumanizazioak markatutako une honetan, Jose Mujica bezalako figurak aitortzeak Beasainek komunitate gisa proiektatu nahi dituen balioak berrestea dakar, hau da, elkartasuna, justizia soziala, ahulenen defentsa eta giza duintasunarekiko konpromisoa”.
Aurkeztuko den mozioak titulua emateko espediente ofiziala hastea aurreikusten du, bai eta senideei eta dagozkion erakundeei erabakiaren berri ematea eta dagozkion administrazio eta herri mailako ekintzak antolatzea ere.
