G007 lineak errefortzu gehiago izango ditu puntako orduetan
Bihar, asteartea, Legazpitik 07:05ean ateratzen den lineak lau autobus izango ditu. Donostiatik itzultzeko "ohiko errefortzuak" jarriko dituzte 15:45ean, 18:45ean eta 20:45ean.
Goierri eta Donostia lotzen dituen G007ko lineako autobusa, joan den astean, Beasainen.Iñaki Gurrutxaga Azahara Dominguez Mugikortasuneko, Turismoko eta Lurralde Antolaketako foru diputatuak azaldu duenez, joan den astean iragarri bezala, Legazpitik eta Zumarragatik 06:05ean eta 08:15ean irteten diren autobusek autobus indargarri bat izango dute. Bihar, asteartea, 7:05ean Legazpitik ateratzen den lineak lau autobus izango ditu. Donostiatik itzultzeko “ohiko errefortzuak” egongo dira 15:45ean, 18:45ean eta 20:45ean.
Gainera, berrikuntza gisa, autobusak prest daude beste zerbitzu batzuk indartzeko, behar izanez gero, 09:15etik aurrera Zumarragatik eta 13:45etik aurrera Donostiatik. Errefortzu horiek astelehenetik ostiralera izango dira.
Beharrak “egunez egun” aztertzen
Diputatuak azaldu duenez, linea berria denez, bere departamentuak ez du aurreko urteetako erabilera-daturik alderatu ahal izateko, eta, beraz, egunez egun aztertzen ditu beharrak, horietara egokitzen saiatzeko.
“Albiste bikaina da egunero ehunka eta ehunka pertsonak mugikortasun jasangarria aukeratzea joan-etorrietarako, eta horrek erakusten digu, zerbitzu erosoa eta eskuragarria eskaintzen duzunean, herritarrek modu masiboan erantzuten dutela garraio publikoaren alde. Lineak indartzen jarraitzea eta eskaintzen dugun zerbitzua zabaltzen jarraitzea da garraio publikoa sustatzeko egin dezakegun politikarik onena”, nabarmendu du Dominguezek.
Herritarrei eskerrak eman dizkie “linea berri horri emandako babes handiarengatik”.
