Kontserban, iraun dezan
Hegaluzea eta tomatea potoetan nola kontserbatu behar diren azaldu du Aitor Uribetxeberria legazpiarrak. Betidanik ikusi izan du etxean, eta, orain, ezagutza horietaz baliatuta eta esperientziak lagunduta, ikastaro bat eman du.
Aitor Uribetxeberria, irailaren 16an, Legazpin.
Jon Urbe / FOKU Betidanik kontserbatu izan dira hainbat jaki potoetan: tomatea, hegaluzea, piperrak… Baina kozinatzeko ohitura aldatu egin da urte batzuetatik bestera, eta eskaintzen zaion denbora oso urria da egun. Orain dela hiru urte hasi zen Aitor Uribetxeberria kontserbak egiten, baina baserritik hartutako tomatearekin. Bere etxean betidanik egin dituzte kontserbak. Hortik datorkio zaletasuna.
Ordutik hona egoera «erabat» aldatu dela adierazi du. Kontatu du gaur egun nolakoa den fruta dendara joan eta tomate udarekarak eskatzeko unea —saltsetarako eta potoetan sartzeko erabiltzen den tomate mota bat da—: «Lehen, tomate udarekara erostera joaten nintzenean, kutxak eta kutxak egoten ziren dendaren kanpoaldean. Orain, berriz, barrutik ateratzen dizkidate, edo hurrengo egunerako ekarriko dizkidatela esaten didate».
Tomatea kontserbatzeko prozesua «erraza» dela dio sukaldariak. Tomatea garbitu, erdibitu eta egosi egin behar da. Eta, ondoren, bakoitzaren gustuen arabera, beste elikagai batzuk gehitu. «Nik tomate birrindua egiten dut. Gero, etxean zabaltzen dudanean, pentsatzen dut zer egin horrekin», azaldu du. Batzuek azukrea botatzen diote tomateari; aukeran, Uribetxeberriak nahiago du azenarioa bota.
Erreportaje osoa Berria.eus webgunean.
