Igeriketa

Hugo Gonzalez de Oliveira eta Nika Godun txapeldun Ordiziako igeriketa txapelketan

Ordiziako 43. Nazioarteko Igeriketa Txapelketa jokatu da gaur Majori kiroldegian. Goizean kanporaketak egin dituzte, eta arratsaldean finalak.

Iñaki Gurrutxaga

Ordizia

2025/12/29

Herrialde Katalanetako Hugo Gonzalez de Oliveirak eta Frantziako Lyon taldean ari den Nika Godun igerilari errusiarrak irabazi dute Ordiziako 43. Nazioarteko Igeriketa Txapelketa. Txapelak janzteko hautagai nagusiak ziren, eta ez dute hutsik egin. Lehen euskalduna Euskal selekzioko Oscar Pascual izan da eta igeriketa egokituko irabazlea Nahia Zudaire.

Gonzalez de Oliveira Polonian Europako Txapeldun izendatu berri den proban –200 metro estiloak–, atera da garaile, eta Godun 100 bularreko proban lortu du puntuaziorik handiena.

Probaren hiru errekor
Lehiaketa Thomas Verhoeven Herbehereetako igerilariaren Txapelketetako errekorrarekin hasi da. 100 tximeletako proban, 52.42ko markarekin, Mario Todorovic kroaziarraren errekorra ehunen bakar batez hobetu du. Ondoren, Ordiziako azken txapelduna –2023ko edizioko garailea–, Jaime Morote, pronostikoak betetzen hasi da. 59.44 markarekin, behin-behineko lehen postura igo da, eta horri eutsi dio Gonzalez de Oliveirak lehen postua kendu dion arte.

Minutu batzuk lehenago, Txapelketako probarik lehiatuena jokatu da, gizonezkoen 100 libreak. Finaleko seigarren postua berdinketa haustean jokatu behar izan dute kanporaketa batekin. Nacho Camposen (2023ko edizioko txapeldunordea) eta Valentin Nesterkyn ukrainarraren arteko norgehiagokan 13 puntuko aldea egon da soilik.

Emakumezkoetan, Frantziako Lyon taldean igeri egiten duen errusiarrak ez die aurkariei aukerarik eman. Goizetik abisatu du, 50 bular erako txapelketako errekorra hautsi duenean. Maria Ramos Espainiako recordwoman-aren errekorra 2021etik zegoen indarrean. Hiru ehunenekotan hobetu du. Hala ere, puntuaziorik onena 100 bularreko proban lortu du, nahiz eta 2021etik Francesca Fangio Italiarrak daukan Txapelketako errekorra (7 ehunenetara bakarrik geratu da) ez hautsi. Baina 100 estiloko proban bai lortu du txapelketako errekorra, eta eguneko txapelketen hirugarren errekorra hobetu du 1.01.61eko denborarekin, Evellin Verrasztoren hungariarraren 1.01.85 marka onduz.

Naiara Pineda bigarren izan da errusiaren atzetik bular estiloko bi probetan, eta podiumeko bigarren postura igotzeko balio izan dio. Hirugarren Portugalgo Mariana Pacheco izan da. Gizonezkoetan bezala, emozioa jarri du txapelketaren azken unera arte, eta 200 estiloetatik 2.15.03rekin, nahikoa izan da hirugarren gelditzeko.

Euskaldun onenak
Sara Costaren eta Nahia Garrido urretxuarraren arteko lehia polita ikusi ahal izan da bizkarreko probetan. Madrildarrak irabazi ditu bi probak.

Euskal Herriko igerilari onenari dagokionez, Oscar Pascual nafarraren 50 libreek, 22.17ko markarekin, 723 puntuak eman diote sari hau lortzeko.

Arratsaldeko azken proba, igeriketa egokituko proba tradizionala izan da. Kasu honetan ere ez da ezustekorik izan eta Nahia Zudaire munduko dominadunak lortu du puntuaziorik handiena.

SAILKAPENAK

Gizonezkoak