SAN BLAS JAIAK

Herranek eta Alberdik irabazi dute 45. Idiazabalgo Herri krosa

Urko Herranek 31 minutu eta 51 segundo behar izan ditu ibilbidea osatzeko eta Helene Alberdik 37 minutu eta 28 segundo.

2026/01/25

Gasteizera eta Zumaiara joan dira aurtengo Idiazabalgo 45. Herri Kroseko txapelak. Bi irabazleek aise osatu dute 10 kilometroko ibilbidea: Urko Herranek 31 minutu eta 51 segundo behar izan ditu, eta Helene Alberdik, berriz, 37 minutu eta 28 segundo. Azken honek sei segundugatik ez du lortu errekor berria ezartzea.

Ohiko moduan, haurren lasterketak egin dituzte lehenengo, benjamin, kimu eta gazteen artean. 12:00etan, berriz, kadete, heldu eta beteranoen mailakoen txanda izan da. Aurtengo parte hartzeari dagokionez, bigarren urtez jarraian, izen emateko epea abendurako itxi behar izan zuten. Guztira, 770 korrikalari inguruk izena eman dute proban.