Bertso saioa egingo dute gaur Legazpin, HITZAren 10 urteurrena ospatzeko
Onintza Enbeita, Unai Iturriaga, Sebastian Lizaso eta Maialen Lujanbiok abestuko dute .Saioa gaur bertan izango da, 22:00etan, Latxartegi aretoan .Gai jartzaile lanetan Asier Iriondo ariko da
Hitzaren 5. urtemugan ere bertso saioa egin zuten Legazpin
Bertso Olariak eskolakoek Hitzaren bosgarren urteurrena ere ospatu zuten. Orduko hartan, bertsolari goierritarrez osatutako saioa antolatu zuten. Aitzol Barandiaran ataundarrak, Iñaki Murua gabiriarrak, Aitor Sarriegi beasaindarrak eta Iker Zubeldia zegamarrak parte hartu zuten.
Azaroko saioa ez da urtean zehar antolatzen duten bakarra. Otsailean bertso afari bat egiten dute, Legazpiko jaietan eurek abesten dute, Agorreko Santikutzetan bi bertsolari ekartzen dituzte eta herriko ekimen ezberdinetan parte hartzen dute. «Deitzen gaituzten guztietan, abestu egiten dugu: Korrikan, Gabonetan…», esan du Nerea Elustondo bertsolariak.
Egun, hiru talde dituzte: bi haurrenak eta bat helduena. Guztira, 20 bat lagun dira. «Kopurua nahiko egonkor mantendu da azken urteotan. Ez dugu gorabehera handirik izan. Herrian bertsolaritza suspertu dugula esango nuke. Modan dago, hasi ginenean baino gehiago».
15 urte bertsotan
2000. urte hasieran eman zituzten lehen pausoak. Aurki taldeak 15 urte beteko ditu, beraz. Ez dakite oraindik ekitaldiren bat antolatuko duten ospatzeko, baina Hitza ez da zoriontzeaz ahaztuko, noski. 
