3. mailara igotzea lortu du Ordiziako Ohorezko Erregionaleko taldeak
Durangoko Cultural taldea 2.B mailara igo denez, ordiziarrek 3.mailan jokatzeko txartela lortu dute
Ordiziako Ohorezko Erregionaleko taldea 3. mailan lehiatuko da datorren denboraldian. Arratsaldeko 20:00etan Ordiziako Udaletxe parean ospatu dute igoera. Harrera egin diete udaleko kideek eta plaka bat eman diete jokalariei. Ondoren, udaletxeko balkoira irten dira lorpena herritarrekin ospatzera.
Durangoko Cultural taldearen garaipenaren ondorioz lortu du Ordiziak mailaz igotzea, talde durangarra 2-0 gailendu baitzaio San Fernandori, eta beraz, 2.B mailara igotzea lortu baitu. Izan ere, Ordiziak liga erregularra bigarren postuan amaitu zuenez, ez zuen zuzenean hirugarren mailara sailkatzea lortu, eta Durangoko Cultural taldearen emaitzen zain geratu behar izan zuen.
Durango igoz gero, 3.mailara beste talde bat igoko zen, Bizkaia, Araba eta Gipuzkoako ligetan bigarren postua lortu zuen talde bat hain zuzen. Horregatik, Ordiziak Araba eta Bizkaiko ligetan bigarren geratutako taldeen aurka jokatu zuen, bi partidak irabaziz. Garaipen horiei esker, Ordiziak 3. mailara igotzea lortu du azkenean.
