V. pilota txapelketa herrikoia ostiralean hasiko dute Legazpin
Aste honetan bi pilota txapelketa hasiko dituzte. Bata Zumarragan eta bestea Legazpin. Zumarragakoa XX. Goñiren omenezko txapelketa izango da eta gaur hasiko da Legazpikoa aldiz, V. pilota txapelketa herrikoia da, ostiralean hasiko dena. Legazpiko txapelketa herrikoiean 52 bikotek eman dute urten izena, iaz baina 4 gehiagok eta estreinekoz nesken bikote bat ere arituko da lehian. Honekin batera, Legazpiko pilota eskolako gazteen txapelketa ere abiaraziko dute datorren astean. Unai Olaizola Legazpiko Gazteak elkarteko kideak dioenez, «oso balorazio ona egiten dugu». «Duela bost urte 24 bikoterekin hasi genuen txapelketa eta egun eskuetatik joaten ari zaigu. Arrakasta handia izan du eta orain lan egitea dagokigu. Gainera, kontuan izan behar da pilota ez dela futbola». Parte hartzeari erreparatuz gero, «gazteenak 16 urte izango ditu eta helduenak 57. Guztiak legazpiarrak dira gainera» dio Olaizolak. Pilotariak 13 multzotan banatu dituzte eta multzoko lehen biak eta 6 hirugarren onenek egingo dute aurrera. Lehen fasea martxoa erdialdera arte luzatuko dute eta atzetik kanporaketak hasiko dituzte. Finala apirilaren 30ean jokatuko da, jai giroan. Egun borobila izango da gainera. Goizean gaztetxoen pilota txapelketako finala jokatuko dute, eguerdian herri bazkaria egingo dute eta arratsaldean azkenik, txapelketa herrikoieko finala jokatuko da. Partida guztiak Urbeltz pilotalekuan jokatuko dituzte. Gaztetxoenak zapatuetan eta nagusienak aldiz, [...]
Aste honetan bi pilota txapelketa hasiko dituzte. Bata Zumarragan eta bestea Legazpin. Zumarragakoa XX. Goñiren omenezko txapelketa izango da eta gaur hasiko da Legazpikoa aldiz, V. pilota txapelketa herrikoia da, ostiralean hasiko dena.
Legazpiko txapelketa herrikoiean 52 bikotek eman dute urten izena, iaz baina 4 gehiagok eta estreinekoz nesken bikote bat ere arituko da lehian. Honekin batera, Legazpiko pilota eskolako gazteen txapelketa ere abiaraziko dute datorren astean.
Unai Olaizola Legazpiko Gazteak elkarteko kideak dioenez, «oso balorazio ona egiten dugu». «Duela bost urte 24 bikoterekin hasi genuen txapelketa eta egun eskuetatik joaten ari zaigu. Arrakasta handia izan du eta orain lan egitea dagokigu. Gainera, kontuan izan behar da pilota ez dela futbola». Parte hartzeari erreparatuz gero, «gazteenak 16 urte izango ditu eta helduenak 57. Guztiak legazpiarrak dira gainera» dio Olaizolak.
Pilotariak 13 multzotan banatu dituzte eta multzoko lehen biak eta 6 hirugarren onenek egingo dute aurrera. Lehen fasea martxoa erdialdera arte luzatuko dute eta atzetik kanporaketak hasiko dituzte. Finala apirilaren 30ean jokatuko da, jai giroan. Egun borobila izango da gainera. Goizean gaztetxoen pilota txapelketako finala jokatuko dute, eguerdian herri bazkaria egingo dute eta arratsaldean azkenik, txapelketa herrikoieko finala jokatuko da. Partida guztiak Urbeltz pilotalekuan jokatuko dituzte. Gaztetxoenak zapatuetan eta nagusienak aldiz, ostiraletan eta igandeetan. Egun hauetako partidak 20:00etan eta 16:00etan hasiko dituzte, hurrenez hurren.
Txapeldunek txapelak, garaikurrak eta jaietako pilota partidurako bina sarrera jasoko dituzte; bigarren sailkatuek garaikurra eta ardo botilak eta hirugarrenek azkenik, garaikurrak eta txuletak.
Zumarragan Goñi Memoriala
Zumarragan bestalde, gaur hasiko dituzte Goñiren omenezko txapelketako partidak. Antolatzaileen esanetan, txapelketa honek «afizionatu mailan dauden pilotari onenak» biltzen ditu eta jokatuko duten pilotarietako batzuk «profesionalak izango dira etorkizun hurbilean». Iazko txapelketa jokatu zutenetatik esaterako, bik jada egin dute profesionaletarako jauzia; Jaunarenak eta Ricok.
Txapelketa gaur hasiko da eta finala martxoaren 23an jokatuko dute. Partidak Zumarragako Beloki pilotalekuan jokatuko dituzte, asteazkenetan. Astero hiru partida izango dira; lehena Zumarragako pilota eskolako gazteena, bigarrena promesen mailakoa eta hirugarrena seniorren artekoa. Aurten Zumarragako bi pilotari (Biain eta Quina) eta Urretxuko bat (Cruz) izango dira txapelketan, hirurak ere promesen mailan. Seniorretan Irureta beasaindarrak ere jokatuko du. Partiduetarako sarrera doakoa izango da.
