Nekazarien ospakizunak gaur eta bihar izango dira Goierrin
Baserritarren eguna, San Isidro, bihar da egutegiz. Baina zenbait herritan bezperara aurreratu dituzte ospakizunak. Gehienek oturuntzak eginez gogoratuko dute nekazarien zaindariaren festa.
Gabirian, adibidez, gaur eguerdian elkartuko dira herriko baserritarrak, Ostatuan bazkaltzeko. Gaintzan ilunabarrerako dute hitzordua; 20:00etan meza izango da, eta ondoren afaria Oteñe jatetxean. Mañukorta eta Zeberio bertsolariak han izango dira.
Ataunen biharko antolatu dute egitaraua. Ohitura duten legez, herriko baserrietako barazkien eta basoko zizen lehiaketak egingo dituzte. Aia auzoan tokatzen da aurten azoka, eta han egongo dira erakusmahaiak eta salpostuak, bihar, igandea, 11:00etatik 13:00etara.
Ondoren bazkaria egingo dute Ataungo nekazariek, Urbitarte sagardotegian.
