Mutiloako Txerri Gorri elkarteak egoitza inauguratuko du igandean
Txerri Gorri kultur elkarteak egoitza berria inauguratuko du igandean. Eguerdiko hamabietan elkartearen ateak irekiko dituzte, bazkideentzat zein herritar guztientzat, eta harrera egingo diete. Ondoren lokalak erakutsiko dizkiete bertaratutakoei, eta segidan mokadua egingo dute. Festa giroa izango da beraz, igande eguerdian, Mutiloan. Izustegi etxearen azpian egon izan da orain arte herriko elkarte bakarra: Aitz-buru. Elkarteak 66 bazkide zituen, eta gehiago izatera iristeko aukera gehiegirik ez zuen ematen, lekua txikia baitzen. Bestalde, Izustegi eraikina partikular batek erosi zuen duela gutxi, eta elkartearentzako lekurik gabe geratu ziren mutiloarrak. Iñaki Ugalde Mutiloako alkateak jakitera eman duenez, «bi arrazoi horiek, eta batez ere bigarrenak, bultzatu gintuen zerbait pentsatzera». Elkarte batek Mutiloarentzat duen eta izan dezakeen garrantziaz jabetuta, Gipuzkoako Foru Aldundiaren Landa Gipuzkoa 32 programaren barruan jasotako diru laguntza erabiltzea pentsatu zuten, etxebizitza berrien eraikinetako baten azpian egoitza eraikitzeko. Eta halaxe egin dute. Guztira, 235.000 euroko aurrekontua izan zuten lanek. Foru Aldundiaren programatik 175.000 euro jaso zituzten, eta Mutiloako Udalak ordainduko du gainerakoa: 60.000 euro. Egoitzak 180-200 metro koadro artean ditu. Azalera horretan, jan-gela handi bat, sukaldea, garbiketako gela, tabernak eta bi komun kokatu dituzte. Aretoaren azpian berriz, biltegi handi bat egin dute. Kultur elkarte berria Egoitza eraikitzeaz gain, kultur elkarte berria ere sortu dute: Txerri [...]
Elkarteko jan-gela
Txerri Gorri kultur elkarteak egoitza berria inauguratuko du igandean. Eguerdiko hamabietan elkartearen ateak irekiko dituzte, bazkideentzat zein herritar guztientzat, eta harrera egingo diete. Ondoren lokalak erakutsiko dizkiete bertaratutakoei, eta segidan mokadua egingo dute. Festa giroa izango da beraz, igande eguerdian, Mutiloan.
Izustegi etxearen azpian egon izan da orain arte herriko elkarte bakarra: Aitz-buru. Elkarteak 66 bazkide zituen, eta gehiago izatera iristeko aukera gehiegirik ez zuen ematen, lekua txikia baitzen. Bestalde, Izustegi eraikina partikular batek erosi zuen duela gutxi, eta elkartearentzako lekurik gabe geratu ziren mutiloarrak. Iñaki Ugalde Mutiloako alkateak jakitera eman duenez, «bi arrazoi horiek, eta batez ere bigarrenak, bultzatu gintuen zerbait pentsatzera».
Elkarte batek Mutiloarentzat duen eta izan dezakeen garrantziaz jabetuta, Gipuzkoako Foru Aldundiaren Landa Gipuzkoa 32 programaren barruan jasotako diru laguntza erabiltzea pentsatu zuten, etxebizitza berrien eraikinetako baten azpian egoitza eraikitzeko. Eta halaxe egin dute. Guztira, 235.000 euroko aurrekontua izan zuten lanek. Foru Aldundiaren programatik 175.000 euro jaso zituzten, eta Mutiloako Udalak ordainduko du gainerakoa: 60.000 euro.
Egoitzak 180-200 metro koadro artean ditu. Azalera horretan, jan-gela handi bat, sukaldea, garbiketako gela, tabernak eta bi komun kokatu dituzte. Aretoaren azpian berriz, biltegi handi bat egin dute.
Kultur elkarte berria
Egoitza eraikitzeaz gain, kultur elkarte berria ere sortu dute: Txerri Gorri elkartea. Elkarteak une honetan 44 bazkide ditu, baina irekita daude bazkide berriak hartzeko.
Behin kultur elkartea sortuta eta egoitza bukatuta, Ugaldek uste du elkartzeko eta jatorduetarako gune bat izateaz gain, egoitzak beste helburu batzuk ere bete behar dituela. «Nire ustez, herritarren arteko harremanak sendotzeko gune aproposa da. Horrez gain, ekintzak antolatzea eta herriari bizia ematea izan behar dira bete behar dituen helburuetako batzuk. Txerri Gorri kultur elkartea den aldetik, hainbat arlotako ekintzak antolatu beharko lituzke, kirol arlokoak barne». Egoitzarekin mutiloarrak oso gustura daudela aipatu du Ugaldek «gauza handia baita herriaren erdian horrelako gune bat edukitzea».
Txerri Gorri elkarteak Mutiloako Udalarekin hitzarmena sinatu du. Adostutakoaren arabera, elkarteak egoitza hori erabili ahal izango du doan, datozen 50 urteetan, eta epea lutzatzeko aukera dago.
