Zaldibian Osinberde bertso sariketa jokatuko dute bihar sei bertsolarik
Bertsolari gazteentzat Goierrin antolatzen den sariketa zaharrena eta ospetsuena hastera doa. Zaldibiako Osinberde saria bihar gauean jokatuko da, izen bereko elkartean —Joxepane ostatua dagoen egoitzan—. Sei bertsolari gaztek parte hartuko dute: bost neska eta mutil bat. Gabirian apirilaren 12an izango den Osinalde sarirako lehen proba baliagarria da Osinberde, eta bi finalista aukeratuko dituzte epaileek. Puntuazioaren arabera, lehendabizi geratzen den bertsolariak jasoko du Osinberde garaikurra. Saioko entzuleek onentzat jotzen duten bertsolariak ere beste sari bat izango du.
Idiazabalgo Axari sariaren lekukoa hartu zuen, iaz, Zaldibiako Osinberdek. Bigarren urtez antolatu dute sariketa. «Oso gustura geratu ginen iaz. Gazteei laguntzeko sariketa da, eta jendeak erantzun ona eman zuen Zaldibian. Bertsolariak ere pozik geratu ziren, ondoren banatu zitzaien inkesta batean ikusi zenez. Sinatuko genuke urtero horrelaxe ateratzea», esan du Osinberde sariaren antolakuntzan dabilen Joxi Irastortzak.
Ohi bezala, bertso saioaren aurretik afaria izango da. 60 bat lagunentzat tokia egongo da elkarteko jangelan. Oraindik 15 bat txartel badaude. Gaur ere erosi ahalko dira, Joxepane tabernan. Jantokia betetzea lortu nahi dute, bertso-giroaren mesedetan. 20:30ean da afaria.
Bertso saioa, berriz, 23:00ak aldera hasiko da. Entzutera joan nahi duenak eta afaltzen izan ez denak ere izango du aukera sartzeko eta bertsoak entzuteko.
Zaldibiako Osinberderen ondoren, Ordiziako Argi-Berri sariak (martxoak 22) eta Aztiriko sariak (martxoak 29) osatuko dute Osinalderen aurreko fasea.
Urteaga beasaindarra
Gemma Urteaga beasaindarra, 2013ko Euskal Herriko Eskolarteko Bertsolari Txapelketaren garailea, nagusien mailan.
