Zaldibian Udaberri Festa ospatuko dute ostiralean, plazan herri afariarekin
«Neguan lozorroan eta ezkutuan egon ondoren, udaberriak eta bere koloreek esnatzeko garaia dute». Mezu horrekin egin du deia Zaldibiako Gazte Asanbladak etzi, ostirala (maitzak 1), festa batera biltzeko. Udaberriko Festa antolatu dute, iluntze-gau parterako.
Arratsaldeko zortzietan elkartu, eta trikitiarekin txikiteoa egingo dute, Zaldibian. Ondoren, saiheski jana egingo dute, plazan, herri afari modura. Edonork afaldu ahalko du.
Urte osorako ekitaldiak antolatzen jarraitzeko asmoan da Gazte Asanblada, eta udaberri-udarako plangintza badaukate jada. Udaberriko Festa izango da herri mailan aurtengo lehenengo jaia, nahiz eta sagardotegi batean afaria antolatu zuten aurretik.
Uda arte kontzertuak, frontenis txapelketa, gaztetxearen urteurren festa eta Gazte Festak izango direla aurreratu dute.
