Herriartekoaren lilura hastera doa
Jon Ander Albisu 2008an, Ataun eta Azpeitiaren arteko Herriarteko Txapelketaren kanporaketan.
Herriartekoa 1968an hasi zenetik, 15. parte-hartzea izango du aurten Ataunek. Lehen bi urteetan aritu ondoren, 1999an ekin zion berriz orain arte oparo doan bigarren aroari. Azkeneko 16 urteotan hiru alditan bakarrik huts egin du, parte hartu gabe. Herriartekoko historikoetako bat den Elgoibarri —40 urtean parte hartu du, nahiz txapelik irabazi ez— aurre egin beharko dio: bihar Ataungo kiroldegian, eta hurrengo ostiralean Elgoibar ikastolako frontoian.
Une gozoa du pilotak gaur egun Ataunen, bai zaletasun aldetik, bai pilotarien mailarenetik. «Afizioa momentuan badago. Giro alaia izango dela espero dugu biharko jaialdian. Pilota eskolakoak eta larriak, denak hurbilduko dira», dio Ataungo taldeko arduradunetako Amaia Albisuk.
Ataunen herriko 11 denda, enpresa eta negoziok eta eskualdeko bi kooperatibak lagundu dute Herriarteko taldea ateratzen. Pilota jaialdian bertako jakien saskikada bat zozkatuko dute.
Kirol arloan, «partida denak ondo joatea eta inork minik ez hartzea» dira, besteak beste, helburutzat jarri dituztenak.
Taldea osatzerakoan, zailtasun handiena kadeteetan izan dute. «Bat dugu, Iraitz Zubizarreta, baina gehiago ez. Lehen pilotan ibili ziren bi laguni eman diegu aukera», dio Albisuk.
Jubeniletan eta seniorretan ez dute eragozpenik izan. Pilotan denbora dezente daramatenak ditu Ataunek. Larrietan, Jon Arratibel sartu dute, iaz bezala, ordezko modura. «Lehen Jon Ander Albisurekin ibilia da, afizionatuetan partida asko jokatutakoa. Iaz ere jokatu zuen, eta uste baino hobeto eta gustura aritu zela zigun».
Senior mailan puntako hiru pilotari ditu Ataunek: Ibai Arratibel, Aimar Zaldua eta Jon Arratibel. Jubeniletan Aitor Azkonobietak, Xabier Regilek eta Iñigo Zabalak jokatuko dute, eta kadeteetan Asier Altunak, Jon Olanok eta Iraitz Zubizarretak.
Jaialdia bihar 22:00etan hasiko da, Auzoeta kiroldegian. Gazteenetik zaharrenetara jokatuko dituzte hiru partidak.
Palan hiru ordezkari
Sendo jarraitzen duen beste atala palarena da. Iazko herri kopurua aterako da aurten ere Goierritik, hiru talde: Olaberria txapeldunordea, Lazkao eta Ordizia. Eskukoek baino astebete geroago hasiko dute palariek Herriartekoa, hurrengo asteburuan. Denera zortzi taldek izena ematen dutenez, final-laurdenetan sartuko dira guztiak lehian.
Faboritoen zerrendan Olaberria kontuan hartu beharko da, beste behin. Guztira bost txapela ditu, eta iazko bigarren postua. Andoainek menperatu zuen, 0 eta 2, Atano III.a frontoian (Donostia) jokatutako finalean.
Kanporaketen adar batean Donostia-Lazkao norgehiagoka egokitu da, zozketaz. Errenteria-Andoain parekatzetik irteten den garailearekin jokatuko dute adar honetako finalaurrekoa. Beste aldean, Oiartzun-Olaberria eta Ordizia-Deba dira kanporaketak. 
