Futbola, gaztetxoak eta giro ona izango dira protagonista Beasainen ostiraletik igandera bitartean. Laugarrenez, Beasain Football Fest kirol jaia antolatu du Beasaingo kirol elkarteak, gazteak eta futbola ardatz hartuta esperientzia ederra biziarazteko asmoz. Atzo aurkeztu zuten kirol festa honen laugarren edizioak ekarriko duena Iñigo Arrese Beasain kirol elkarteko lehendakariak, Koldo Agirre herriko alkateak eta Luis Garmendia Beasain kirol elkarteko zuzendaritza taldeko kideak.
Garmendiak ekitaldiaren xedeetako bat Beasain kirol elkartea «herriratzea» dela esan zuen; herritarrak elkarteko kide sentiaraztea. Batzeko asmo hori egitarauan ongi islatua dago, taldean gozatzeko ekintza ugari antolatu baitituzte.
Gainera, egunero, hala nahi dutenek, jatetxe-taberna bat izango dute eskura Loinazko San Martin plazan. Han, Txominen parrilan egindako pintxoak edota hanburgesak dastatu ahal izango dira, besteak beste. Ostiralean 16:00etatik 23:00etara egongo da zabalik; larunbatean, 09:00etatik 23:00etara; eta, igandean, 09:00etatik 21:00etara.
Bestalde, Garmendiak argi utzi du festaren ardatza gaztetxoak izango direla: «Besteak futbolean ikustera ohituta daude, eta horrelako ekitaldi batean beraiek ardatz izatea oso polita dela uste dut», zehaztu du. Ekitaldi hau «festa» bat dela ere gogorarazi du, eta ez «norgehiagoka» bat. «kontua ez da nork irabazten duen; festan haurrek irabazten dute, eta horrenbestez, denok».
Atzo amaitu zen izena emateko epea eta 80 bat talde zeuden izena emanda, baina azkenean «ehundik gora» izatea espero dute.
EGITARAUA
Ostirala
- 13:00-14:00: Iñaki de Mujikaren La movida deportiva irratsaioa Artzai Eneatik zuzenean.
- 16:00-23:00: BeFF 14 futbol festaren hasiera.
- 16:00-20:30: Gaztetxoen arteko 3×3 futbol partidak Loinaz plazan.
- 20:30-21:30: Beasain K.E.ko talde guztien aurkezpena.
Larunbata
- 09:30-20:30: Gaztetxoen arteko 3×3 futbol partidak Loinazko San Martin plazan.
- 11:45-13:00: Igartzako dantzarien kofradiaren ezpata-dantza.
- 20:30-21:30: Beasain Kirol Elkarteko jokalari ohien arteko 3×3 futbol saioa.
Igandea
- 09:30-14:30: Gaztetxoen arteko 3×3 futbol partidak.
- 13:30-14:15: Basurdetxoen harrapaketa jolasa.
- 14:30-16:30: Paella erraldoia plazan. Bertso saioa. Jokalari guztientzako opariak.
- 16:30-17:00: Basurdetxoen harrapaketa jolasa.
- 17:00-19:00: Gaztetxoen arteko 3×3 futbol partida finalak.
- 19:00-20:00: Finalisten sari-banaketa.
- 19:00: Saski erraldoiaren zozketa.
