Ekitaldi ugari izango dira asteburuan Lazkaon, urteko oparoenetakoa kopuruz
Urteko asteburu oparoenetakoa, hornituena ez bada, izango dute Lazkaon bihartik igandera. Irailean ohitura bihurtu denez, ekitaldi askok bat egingo dute. San Migel jaien aurreko asteburua aukeratu ohi dute elkarte askok beren jarduera burutzeko.
Batetik, Lazkaon merkatari elkarteak stock azoka antolatu du, larunbaterako. 10:00etatik 19:00etara, etenik gabe, plazako pilotaleku estalian herriko komertzioek eta zerbitzuek produktuak edo lana erakutsiko dituzte. Lazkaoneko bazkideek (doan) eta kide ez direnek (90 euro ordainduta) parte har dezakete. 100 euroko erosketa-txartela zotz egingo dute erosleen artean. Haurrentzat puzgarriak egongo dira.
Udalak argitaratu duen agendan iragarrita zegoen txapelketa bat zerrendatik erori da, hala ere. Larunbatean jokatzekoa zen Street Roller txapelketa ez da egingo. Hurrengo larunbatekoa mantentzen da: Euskal Herri osoko irristalariek zazpi herrialdeetako lehen lehiaketa dute.
Elkartasunezko bi probatxo ere izango dira. Bat, mugikortasun iraunkorra bultzatzeko bizikleta martxa, haurrentzat (bihar 17:30ean, plazatik abiatuta). Bestea, Kontseiluak sortu eta udalaren Euskara Batzordetik prestatu den Euskaraz bizi nahi dut korrikaldia (etzi eguerdian).
Dantzari Txiki eguna, jaian
Ohiturari segiz, eta Dantzari Txikien denboraldiaren hondarrean, Oin-Arin taldeak iganderako antolatu du Lazkaoko hitzordua. 10:30ean elkartuko dira dantzariak, eta hamaiketakoa egin ondoren kalejiran ibiliko dira herri gunean, bi multzotan bereizita. 12:15ean Beasaingo joaldunak aterako dira, eta 13:00etan plazan alarde bateratua egingo dute dantza talde gonbidatuek. Bazkaldu, eta 17:00etan Jon Urbietarekin dantzaldia izango da.
Zazpi talde izango dira Lazkaoko Dantzari Txikin: Goruntz (Gabiria), Amaiur (Iruñea), Gazte Barri (Dima), Amets-Bide (Ordizia), Aurtzaka (Beasain), Berriztasuna (Portugalete) eta Oin-Arin.
Mendi duatloiak, jarraipena
Lazkao Xtrem kirolari taldeak iaz sortu zuen mendi duatloia, eta zapatuan bigarren ekitaldia jokatuko da. Goizean, 10:00etan hasita, 12 urtera arteko haurrak lehiatuko dira. Plazan eta Harizti Handi parkean osatuko dute zirkuitua.
Helduen txanda 16:00etan hasiko da, esprint modalitatean. Korrika 2,5 kilometro, mendiko bizikletarekin 7, eta atzera korrika kilometro bat egin beharko dute. Izena aurrez eman liteke (15 euro), kiroldegian edo sailkapenak.com webgunean.
Geroz eta ekitaldi gehiago
Garai batetik hona asko ugaritu da iraileko kultura-egitaraua. «Lehen, San Migel egunean herri afaria eta jubilatuen meza izaten zen, besterik ez. Orain, bi asteburu lehenagotik hasita, egitarau bete-betea izaten da. Herriko eragile eta elkarte ugarik parte hartzen dute, udalarekin batera», dio Miren Larrañaga Kultura teknikariak.
Asteburu hau aberatsa bada, hurrena ez da amutsagoa: sagardo edatea, Euskal Herriko Skate Txapelketa, Basherri Eguneko azoka eta San Migel izango dira.
Ekitaldiak
Lazkaon, asteburuan
Bihar
Lazkaoko mendi duatloia, iaz./Mikel Albisu
- Bizikleta bira. Herrian barrena, plazatik abiatuta, 17:30ean.
- Stock azoka. 10:00etatik 19:00etara, plazako frontoian.
- Euskararen korrikaldia. 12:00etan, plazan.
- Duatloia. 10:00etan haurrak, 16:00etan larriak.
- Dantzari Txiki eguna. 10:30etik aurrera.
