Asteburuan Beasainen egongo diren ekintzen artean,
hiru kirol ekintzak izango dira, eta ez nolanahikoak, gainera: Euskadiko Kadete Mailako Saskibaloi Txapelketa, Bealakek antolatutako erreleboak eta Aizkorri Mendizale Elkartekoen Finalista Eguna egingo dituzte, gaur, bihar eta etzi.
Euskadiko Saskibaloi Txapelketa
Gaur arratsaldean hasiko da Euskadiko Saskibaloi txapelketa, Antzizar kiroldegian. 19:30ean Gipuzkoako neskek Bizkaiakoen aurka jokatuko dute, eta jarraian Gipuzkoako mutilek bizkaitarren aurka jokatuko dute. Esan, Gipuzkoako taldean BKLko Iñigo de la Hera beasaindarrak jokatuko dute Gipuzkoako mutilen artean.
Larunbat goizeko 09:45ean hasiko dira partidak, atzera, eta Arabako eta Bizkaiako nesken lehia ikusteko aukera izango da orduan. Jarraian lurralde berdineko mutilek lehiatuko dute elkarrekin.
Txapelketarekin amaitzeko, igande goizeko 10:00etan Gipuzkoako eta Arabako neskek lehaituko dute, eta 12:00etan mutilek. Amaieran, sariak banatuko dituzte.
Erreleboen lasterketa
Benjamienek eta Alebinek ere izango dute kirolaz gozatzeko aukera, larunbat goizean Bealak taldeak antolatuko dituen IV. Errelebo lasterketetan. Nafarroa etorbideko 55 eta 57 zenbakien inguruan egingo dituzte erreleboak 10:30ean hasita, neskek eta mutilek. Benjaminek 120 metroko zirkuitu bati lau bira eman beharko dizkiote, eta alebinek 240 metroko zirkuituari lau bira. Bertan parte hartu nahi dutenek izena eman beharko dute taldeka
bealak.com orrialdean, bertan ikastetxearen izena, maila eta parte hartuko duten lasterkarien izen-abizenak adieraziz.
Finalisten Eguna
Korrikan aritzea baino, mendi-buelta bat ematea nahiago dutenek, berriz, igandean izango dute kirolarekin zita. Aizkorri Mendizale Elkarteak Finalista Eguna ospatuko du igandean. 08:30ean abiatuko dira, eta Murumendira igo ondoren Garina jaitsiko dira. Garinen, Finalista Eguna izanik, geldialdi berezia egingo dute. Jai giroan dominak eta sariak banatuko dituzte kide mendizaleen artean eta bertaratzen diren guztiei hamaiketakoa eskainiko diete.
Horrez gain, gaur iluntzeko 20:00etan Juan Luis Ruizek denboraldi honetan egindako mendi irteeretako argazki emanaldia egingo du Aizkorri Mendizale Elkartekoek Arana kaletan duten lokalean.
