Errekak gainezka datoz eta uholde arriskuaz ohartarazi dute

Uholdeen arriskurako protokoloa martxan jarri du Herrizaingo Sailak · Iganderako elurra egingo duela dio eguraldi iragarpenak

Goierriko Hitza

Goierri

2015/01/30

Negu-neguko asteburua dago iragarrita; euriagatik, haizegatik eta elurragatik alertan gaude. Eta momentuz, iragarpenak betetzen ari dira. Atzo gauetik euri asko egin du eta errekak hazita datoz. Zegaman 55 l/m2 egin ditu Euskalmetek emandako datuen arabera. Erreka eta ibaietan dago une honetan arreta gune nagusia. Matxinbentan maila horia gainditu du Ibai-Eder errekak; Oria eta Urola ibaiak ere hazita doaz, baita Agauntza eta beste erreka batzuk ere. Ibaiek gainezka egiteko arriskua dela eta, uholdeen prebentziorako protokoloa martxan jarri du Eusko Jaurlaritzaren Herrizaingo Sailak. Beasainen, 3 metroko altuerara iritsi da Oria ibaia. Ezkiaga auzoan hare zakuak banatu dituzte, portal eta garaje sarreretan jartzeko. Udaletik azaldu dutenez, uraren maila 3,5 metrora iristen bada, auzo horretako garajeak husten hasiko dira. Ordizian berriz, itxi egin behar izan dute N-1 errepidearen azpiko pasabidea, Oria ibaiak gainezka egin baitu pare horretan. Ormaiztegiko sarreran ere, zentral elektrikoaren parean, errekako urak errepideraino atera dira.

Errepideak Errepideetan ere arazo ugari sortzen ari dira, batez ere ur putzuengatik eta lur zorua irristakor dagoelako.Hala, behar-beharrezkoa ez den kasuetan autorik ez hartzeko gomendioa egin du Herrizaingo Sailak. Eguerdiko 13:30ak eta 14:00ak artean, istripu bat izan da N-1 errepidean, Olaberria parean. Egunotako iragarpena Eguraldiak ez du hobera egingo datozen ordu eta egunetan. Euskalmeten iragarpenaren arabera, bihar euria eta kazkabarra egingo du. Elur maila 600-800 metro artean kokatuko da goizean, eta arratsaldetik aurrera, 300-400 metroraino jaitsiko da. Igandean berriz, elurraren maila 200-300 metro artean kokatuko da, meteorologia agentziaren arabera. Gainera, tenperaturak asko jaitsiko dira larunbat gauetik aurrera.