Ezkion Martxan kirol taldea sortu dute herrigintza eta kirol jarduna uztartu asmoz

Aurreko otsailean sortu dute eta 8-10 lagunek bultzatu dute egitasmoa. Orain taldearen berri zabaldu eta ezkiotarren interesa neurtu nahi dute. Kirol probak antolatu nahi dituzte

Miriam Luki

Ezkio

2017/05/12

18404238_10203248073080563_1228656490289277023_o

Izazpira Igoera mendi lasterketa jokatu zuten igandean. Irudian, Aritz Egea, gurutzera iristen. // Asier Arazola

Ezkion Martxan taldea sortu dute herrian kirol jarduerei bultzada emateko eta, bide batez, Ezkioko herri izaera sendotzeko. Aurreko otsailean sortu eta taldearen izenarekin hainbat gorabehera izan ondoren, dagoeneko elkartea dira. Orain, taldearen berri eman nahi dute eta ezkiotarrek kirolarekiko duten interesa neurtu. Ezkion txirrindu proba bat egin ohi da, jubenil mailakoa. Iaz ez zen egin eta aurten berriro egiteko asmoa dute. Ezkiora bizilagun berriak etorri, eta mendi lasterketak ere bultzatu nahi dituzte. Aritz Egea lasterkaria da taldearen sortzaileetako bat, «Ezkio herri txikia izanda txirrindulari elkarte bat eta lasterketak antolatzeko beste bat sortzeak ez zuen zentzurik. Horrenbestez, talde bakarra eratzea pentsatu genuen». Oraingoz 8-10 bat lagun bildu dira taldera. «Udalarentzat pozgarria izan da, ekintzak antolatzeko prest dagoen jendea da- goela ikusi dutelako. Gainera, elkartearen bokazioa kirola eta herrigintza uztartzea da». Antolatuko dituztenak Sortu berri duten elkarteari esker, ezkiotarrek hurrengo urtean han bertan mendian federatzeko aukera izango dutela nabarmendu du Egeak, «horrez gain, hainbat jarduera antolatzeko asmoa daukagu. Ekainean, Santa Lutzi auzoko San Pedro jaietan txirrindu lasterketa bat egingo dugu». Mendi lasterketa misto bat antolatzekoak ere badira, «bikotean korrika egiteko lasterketa izango da, Ezkio inguruan egingo duguna. Nolanahi ere, ia-ia lotuta daukagun arren, oraindik definitzen ari gara», dio Egeak. Haurren lasterketa bat ere badute buruan. Taldearen berri eman dute orain, «jendeak martxan gaudela jakin dezan eta guztion artean sare bat antolatu nahi dugu. Ezkiotarrek kirol taldearen jardunarekiko interesaren termometroa izan dadin egin dugu deialdi hau». Taldeari buruz gehiago jakin nahi duenak Ezkioko udaletxean galdetu dezake edo ezkionmartxan@gmail.com helbidera idatzi.

Pello Garinen marka ontzetik 15 segundora gelditu da Aritz Egea

Azken elkarrizketak

Azken bideoak

Argitalpen bereziak