Gipuzkoako rogaine proba egingo dute uztailaren 1ean Zegaman
Rogainea orientazio kirol bat da. Proba Iberiar penintsula mailako ligarako baliagarria da. Zegamarrak ibilbide finko bat prestatzen ari dira eta uda ondoren prest egongo da
Uztailaren 1ean Gipuzkoako III. Rogaine proba egingo dute Zegaman. Rogainea orientazio kirol bat da eta Zegamako proba Iberiar penintsula mailan jokatzen den ligarako baliagarria izango da. Dagoeneko Estatu espainiar osoko 200 lagun baino gehiagok eman dute izena.
Ekitaldia atzo aurkeztu zuten Zegamako udaletxean. Joseba Izagirre Zegamako alkateak, Ibon Goikoetxea GOT elkarteko kideak eta Niko Osinalde Goiturreko zuzendariak parte hartu zuten.
Goikoetxeak rogainea hemendik kanpo oso ezaguna dela esan zuen. Parte hartzaileek denbora jakin batean ahalik eta puntu gehien lortu behar dituzte. Horretarako, mapan ageri diren balizak aurkitu behar dituzte. Baliza bakoitzak puntu zehatz batzuk ematen ditu. Iristeko zailak diren tokietan dauden balizek puntu gehiago ematen dituzte. Estrategia joko bat ere bada, beraz.
Zegaman bi proba egongo dira. Bata sei ordukoa izango da eta Iberogaine ligarako baliagarria izango da. 10:00etan hasiko da. Bi eta bost laguneko taldeek parte hartuko dute. Bestea hiru ordukoa izango da. 11:00etan hasiko da. Hau herrikoia izango da eta bakarka edo taldeka parte hartu ahal izango da. Bukaeran, parte hartzaileei bazkaria emango diete eta sari banaketa egingo dute. Gainera, opariak zozkatuko dituzte, besteak beste, Zegama-Aizkorri maratoirako dortsal bat. Izena GOT elkartearen webgunean eman behar da, hilaren 28a baino lehen.
Izagirrek Zegamarentzat oso ekitaldi garrantzitsua dela esan zuen. «Zegaman garatuko da bere osotasunean, 20 kilometro koadroko eremuan. Zegamako mendiak jendeari erakusteko balioko digu».
Ibilbide finko bat prestatzen ari direla aurreratu zuen. «Jendeak rogainea ezagutzea nahi dugu. Mendiaz beste era batera gozatzeko modu bat da. Horretarako, ibilbide finko bat prestatzen ari gara. Uda eta gero prest egongo da. Ibilbide hau Anduetza parketxeak kudeatuko du».
Bukatzeko, Osinaldek proba hau bisitari berriak lortzeko oso baliagarria dela esan zuen. Horregatik babestu dute. 
