Jubilatuen elkarteko kideek irabazi dute Zegamako paella lehiaketa

Begoña Etxezarretak eta Mari Carmen Lardizabalek irabazi dute lehiaketa. Bigarren saria Tartaloetxe elkarteko Anartz Goiak eta Nekane Arantzamendik eskuratu dute.

Goierriko Hitza

Zegama

2017/08/25

Paella lehiaketako irabazleak, garaikurra jasotzen. / Maialen Igartua

Paella lehiaketa izan dute goizean Zegaman, San Bartolome jaietan. Elkarteetako kideek parte hartu dute, eta denek osagai berberak erabili dituzte: oilaskoa, ilarrak eta piperrak. Hamar bikotek parte hartu dute, eta herriko bi sukaldarik egin dituzte epaile lanak. Jubilatuen elkarteko Begoña Etxezarretak eta Mari Carmen Lardizabalek irabazi dute lehenengo saria. Bigarren postua, berriz, Tartaloetxe elkarteko Anartz Goiak eta Nekane Arantzamendik eskuratu dute. Garaikur bana eman diete bi bikoteei. Ondoren, herritarrek lehiaketako paellak dastatzeko aukera izan dute. Ilara luzea osatu da eguerdian, paella probatzeko irrikitan. Arratsaldean bertso saioa izango dute Zegaman. Iluntzean, berriz, herri afaria. Lumagorri oilaskoa eta Sant Sadurni d’Anoiako cava izango dituzte afaltzeko. Eta gauean, ohitura den bezala, Joselu Anaiekin erromeria. EGITARAUA Abuztuak 25, ostirala

18:00. Bertsolarien bigarren saioa, udaletxeko arkupean.
19:30. Buruhandi eta erraldoiekin kalejira, Tobera Musika Eskolako trikitilariekin.
21:30. Herri afaria, Luma Gorri oilaskoarekin eta Sant Sadurni d’Anoiako cavarekin.
Gauean: Joselu Anaiak

Abuztuak 26, larunbata

10:30. Herritarren arteko toka txapelketa.
13:00. Kuadrillak plazan elkartzea.
14:30. Kuadrillen arteko bazkaria, Incansables txarangarekin, Aitxuri Herri Eskolako patioan.
17:00. Kuadrillen arteko txapelketa, Aitxuri Herri Eskolako patioan.
19:30. Kuadrillen kalejira buruhandi eta erraldoiekin.
Gauean: Tximeleta taldearekin dantzaldia.

Abuztuak 27, igandea