After Sun festa antolatu dute Ordiziarrock Ekintzak taldekoek irailaren 15erako. Plaka fotovoltaikoak erabiliko dituzte, eta egun osorako egitaraua prestatu dute
Jaialdi oso berritzaile batekin datoz Ordiziarrock taldeko lagunak, izan ere, irailaren 15erako After Sun Festa antolatzen ari dira, Oiangun. Horrela esanda badirudi berritzailetik gutxi duela eta beste musika jaialdi bat gehiago baino ez dela izango, baina usteak uste, ez da hala izango. Jaialdian erabiliko den argindar guztia energia fotovoltaikoaren bidez sortua izango baita. Horrez gain, egitarau oso potentearekin datoz, bai musikari dagokionez eta baita egun horretarako prestatu dituzten bestelako ekintzei dagokienez ere. Keu Agirretxea, Ekiza, Maider Zabalegi eta Los Pies del Gato izango dira After Sun Festan.
Eguzkiaren indarra
Jurgi Ekiza lapurtarra; bakarlari gisa dator.
Ordiziarock-eko kideek beste behin erakutsi dute irudimen handia behintzat badutela. Ohiko argindarra erabili beharrean, eguzkiaren indarra aprobetxatuz jarri nahi dute jendea dantzan. Izan ere, eguzki plakak erabiliko dituzte soinu ekipoak funtzionarazteko.
Horrelako jaialdirik, inguruan behintzat ez da besterik egin. «Aspaldi buruan zebilkigun ideia zen, eta egitea posible zela ikusi genuenean erronka berri honi heldu genion», adierazi du Urko Ruizek, Ordiziarrock-eko kideak.
Energia plaka fotovoltaikoak erabiltzeaz gain, musika guneak bizikletak sorturiko energia zinetikoaren laguntza ere izango du. Energia fotovoltaikiak dituen aplikazio desberdinen erakusketa eta horren inguruko tailerrak ere egongo dira gerturatzen den ororentzat.
Egun osorako plana
After Sun Festak sei gune izango ditu: haurrentzako jolas gunea, energia fotovoltaikoaren gune didaktikoa, zerbitzu gunea, Legorretatik Mundura proiektu sozialaren standa, Aranzadi gunea eta musika gunea. Goizean jarriko dute guztia martxan, beraz izango da zer egin, zer ikasi eta zerekin gozatu Oiangun antolatuko duten jaialdian. Adin guztietako publikoarentzat prestatutako jaialdia izango da. Egunari amaiera polita emateko asmoarekin, behaketa astronomikoa ere antolatu dute.
