Albisu eta Irribarria Ataunen lehiatuko dira larunbatean, sailkapena poltsikoan dutela
Ataungo Auzoeta kiroldegian pilotari profesionalen jaialdia izango da, larunbatean, 17:45ean hasita. Iraitz Zubizarreta ataundarrak jokatuko du lehenengo neurketan, Erasun atzean lagun, Alberdi-Iturriagaren aurka. Ondoren, txapelketako partida.
Kirol arloan aurretiko lan guztiak eginak —eta ondo eginak— direla iritsiko dira Iker Irribarria aramarra eta Jon Ander Albisu ataundarra Binakako Txapelketako final-laurdenetako fase luzearen atzenera. Ataunen jokatuko dute bi goierritarrek, elkarren aurka, 14. eta azken jardunaldian. Larunbatean 17:45ean hasiko da jaialdia, Auzoeta kiroldegiko frontoi azkarrean.
Bi ataundar ariko dira. Lehen partidak, Iraitz Zubizarreta aiarrak Erasunekin bikotea osatu, eta Alberdi-Iturriagaren aurka jokatuko dute. Iazko apirilean ere profesionalekin batera sartu zuten Zubizarreta. Ondoren, Binakako Txapelketako estelarra hasiko da: Victor-Albisu eta Irribarria-Zabaleta.
Bi bikoteak finalaurreko ligaxkara sailkatuta daude, dagoeneko. Elezkano-Rezusta sailkapenburuak bezalaxe. Laugarren bikote batentzat dago tokia, eta horrek piztuko du ikusmina, zeharka bada ere, Ataunen. Izan ere, Iruñean Artola-Mariezkurrenak zer egiten duten aiduru daude denak: irabazten badute, Ataunen paradoxa: bi bikoteen enpresei norbere pilotariek galtzea ‘komeni’. Altuna-Martija daude zain-zain (igandean jokatuko dute).
Gaur, pilotak aukeratu dituzte Victor-Albisu eta Irribarria-Zabaleta bikoteek, Auzoetan. Bi goierritarrek “irabaztera” irtengo direla ziurtatu dute. Joxemiel Barandiaran Herri Ikastetxeko haur saldoa izan dute begirale eta animatzaile. Sinadura mordoa eman behar izan diete pilotariek, batez ere Albisuk.
Jaialdirako sarrerak, aurrez Ataungo tabernetan dauzkate salgai: Martxintxon, Troskaetan, Sutegin eta Bitorrenean. Helduenak (12 urtetik gora) 25 euro balio du, egunean bertan erosiz gero 30 euro. Umeenak (4-12 urte artekoak) 10 euro aurrez, 15 egunean.
Argazkiak: Iñigo Alzua (lehena), Baiko Pilota (lau pilotariena) eta Aimar Maiz (gainontzekoak).
