Udaberria kulturara ere iritsiko da Gabiriara
Udaberri Kulturala egitarauan, 23 egunetan 25 ekitaldi antolatu dituzte gabiriarrek. Bihar hasiko da, eskola-umeen antzerkiarekin, eta ekainaren 16ra arte iraungo du.
Asisko Urmeneta iruindarra Gabirian izango da, aurrenekoz. // Argazkia: Isabelle Mikelestorena Negu bukaeratik sanjoanak arte, dena da udaberri. Hitzari eta azken urteetako ohiturari eutsita, Gabirian hiru hilabete eta erdiko iraupeneko Udaberri Kulturala izango da.
Balentzategi eskolakoen antzerkiarekin hasiko da, bihar. Hezkuntza Sailaren Nolega proiektuan ari dira, ahozkotasunari arreta jarrita. Bertso, antzerki, abesti eta dantza txertatuko dituzte, herritar guztientzat irekitako saioan. Mitologiaz bost lan sortu dituzte emanaldirako.
Egitaraua «zabala eta osoa» da, Iñigo Igartzabal Kultura zinegotziak azaldu duenez. Kultura Batzordean ateratako gaiez gain, herrian epe horretan antolatzen direnak sartu dituzte.
Mendiarekin lotuta, hiru egun izendatu dituzte, apirilaren 4tik 6ra. Euskal Herriko Sokatira Txapelketak eta kirolarien solasaldiak osatuko dute kirol arloa.
Antzerki konpainien antzezlanak bi dira: Rita eta Agirin berdintasun taldeak M-8rako antolaturiko Tomiris zuzeneko ikuskizuna (16 urtetik gora).
Berritasun bat Peruharriko (Leitza) irteera da, Perurenari iazko bisita itzultzeko. Asisko Urmeneta ere lehen aldiz joango da Gabiriara. Goruntzeko helduek saioa egingo dute, Andre Mari egunekoaren ordezkoa.
Udaberri Kulturala 2019
Martxoa:
· Bihar. Eskolakoen antzerkia. Elizako saloian, 17:00etan.
· 8, ostirala. Emakumeen Eguna. ‘Tomiris’ antzerkia, saloian, 22:30ean.
· 9, larunbata. IV. Gazte Eguna.
· 9, larunbata. EHko Sokatira Txapelketa (mistoa). Frontoian, 17:00etan.
· 14, osteguna. Makrobiotika ikastaroa. Erbie elkartean, 17:00etan.
· 16, larunbata. Haurrentzat filma. 17:30.
· 17 eta 23, larunbatak. Bola txapelketak.
· 24, igandea. Dantzari Txiki Eguna.Apirila:
· 4, osteguna. ‘Denbora izeneko leku bat’ dokumentala. Kultur etxea, 19:00.
· 5, ostirala. II. Kaleko Eskalada Txapelketa. Plazan, 18:00etan.
· 6, larunbata. IV. Leharrei mendi lasterketa.
· 12, ostirala. Asisko Urmenetaren ‘Eusklabo alaiak’. Kultur etxea, 18:30.
· 13, larunbata. 21.Korrika (09:30, Altzibar). Pintxo lehiaketa, plazan, 11:00.
· 13, larunbata. Aztiriko Bertso Saria. Afaria (20:30) eta gazteen saioa (22:30).
· 27, larunbata. Osinalde Bertso Saria.Maiatza:
· 4, larunbata. Peruharrira (Leitza) irteera.
· 10, ostirala. ‘Erraiak’ dokumentala. Kultur etxean, 22:00etan.
· 11, larunbata. Goruntz taldeko helduen dantza saioa. Plazan, 17:00etan.
· 12, igandea. ‘Rita’ antzerkia. Saloian, 18:00.
· 19, igandea. Jubilatuen eguna. Bazkaria Osinalde elkartean.
· 24, ostirala. Kirolarien mahai-ingurua, kultur etxean, 18:30ean.Ekaina
· 16, igandea. Txindata musika eskolakoen kontzertua. Saloian, 17:00etan.
